Aizawl District Court-a Special Judge (PC Act) Dr HTC Lalrinchhana chuan PWD Western Circle-a Junior Engineer thawk lai, C.Lalfakawma chu hlemhletna thubuaiah thiam loh a chantir.
Court judgement order-a tar lan a nih danin Mizoram sorkara PWD Deputy Secretary H. Thanga Zate chuan contractor hnena pawisa indil chungchangah C. Lalfakawma lakah hian Lok Ayukta-ah thubuai a theh lut a, C. Lalfakawma chu PWD Khawzawl Division-a JE hna a thawh laia Rabung atanga Aiduzawl kawng laih leh enkawl zui thawktu contractor, Lalroenga hnen atanga dikhlel taka Rs nuai 17 laah leh Sub-Contractor anhmingthanga hnen atanga Rs nuai 3 la ah puh a ni.
Court-in thubuai angaihtuah lai hian C. Lalfakawma’n pawisa a lak sak nia tar lan, Lalroenga leh Vanhmingthanga te hi sorkar lam thuhretua an tannaah an inhnuhdawh avangin thamna sum emaw dawng anga an puhnaah finfiahna hmuh a ni lo.
Heti chung hian C. Lalfakawma chu Central PWD Manual, 2014 Clause 33-na kalha ama duhsak zawng, a thlen in pa leh thianpa ni bawk, Vanhmingthanga, sub-contract hna a lo siamsak avangin Section 409 IPC leh Section 13 (2) of PC Act, 1988 angin thiam loh chantir a ni ta a ni.
Court hian a thutlukna bultannaah, “Hmasawnna hnathawhnaah sorkar hnathawk engineer-ten vuaicha tak emaw leh an tih tur an tih loh avanga hna an vil uluk loh hian mipui sum pai tam tak awmze nei loah a luan raltir chawk,” tih tar langin, “Hemi thubuaiah pawh hian sorkar hnathawkin a thuneihna ama tan emaw, a vua leh vang hnaivaite hamthatna bil atan a hmang sual tih laih lan a ni,” a ti a; “Mi rethei leh hnuaihnungte tan hlei hlei hetiang thil hi do a tul,” tih tar lan a ni bawk.
PC Act-in hlemhletna thubuaia thiam loh a chantir, C.Lalfakawma hi PWD Western Circle-a JE thawk lai a ni.