Mexico-a Pacific vaukam, miin chawlh hmanna atana an tlawh nasat tak, Acapulco chu lirnghing na takin a sawi.
Magnitude 7.0 vela na hian km 370 vela hlaa awm, Mexico City pawh a sawi pha a, mi chengte leh khualzinte chu an in leh khualbuk atangin pawnah an tlan chhuak nasa hle.
State eng emaw zatah power a awm lo nghal a, Acapulco chhehvela awihtlan, mi tam takin an tlawh thin chu a sawi chhe nual nia sawi a ni.
Acapulco bul alawka Coyuca de Benítez-ah mi pakhat chu hmun sang atanga tlain a thi.
President Andrés Manuel López Obrador chuan chhiatna liantham thleng a awm lo niin a sawi.
Acapulco-ah hian lirthei chunga electric ban tlu leh biak in chim a awm niin AFP news agency chuan a tar lang.
Acapulco Mayor Adela Román chuan lirnghing hian khawpuia chengte a tichiaiin an hlauthawng hle tih a sawi a. “Sawi nawn leh a awm ringin thinthi lo takin an awm hlawm,” a ti.
Mihring chenna hmun eng emaw zatah gas put hriat a nih thu a sawi bawk.
Mexico City-ah chuan zan mut laiin mut thawmhnaw nen pawnah an chhuak nasa hle a. “Hetiang a thlen apiang hian kum 1985-a lirnghing kha ka hre chhuak ziah,” tiin putar kum 70 mi, Yesmin Rizk chuan Reuters news agency a hrilh.
“Zanin hi chuan tumah kan mu zui tawh lo vang,” a ti bawk.