Sudan ram chhunga Nile luipui tui lian zel chuan hman lai hmun hlui vawn that (ancient archaeological site) a tichhe mai ang tih hlauhna a lian hle a. Thil hlui chanchin zirmite chuan tuna tui lian hi hriat china a chim san ber niin an sawi.
Sudan Antiquities Service-a French Archaeological Unit hotu, Marc Maillot chuan kum sangbi hnih liam taa Meroitic empire-a lalte thuthmun hlui vawn that, Al-Bajrawiya chu tuiin a chim chhiat mai an hlauh avangin balu bag hmangin a dalna an siam a, tui an paih (pump) chhuak reng bawk niin a sawi.
“Tun hmain tui lian hian he hmun hi a la tibuai ngai lo,” tiin Maillot chuan a sawi.
He hmunah hian khawvela hmun lar tak, Meroe pyramids an tih pawh awmin UNESCO World Heritage Site (UN-in hmun a humhalh bik) zinga mi a ni.
Khawvela luipui sei ber, Nile kamah hian lo neituten lo an nei nasa ta. An tan chuan kum tina a kuang liam tuiin lei tha a vawrh chhuah hi an intunnunna a ni.
“Tunah chuan kan la thunun thei a; mahse, Nile-in a chim chin hi a san zel chuan hma kan lo lak vena hian awmzia a nei lo vang,” tiin Maillot chuan a sawi.