Aizawl : Khawzawl Arro Venga District Research Office building thar chu nimin khan bialtu MLA, Dy. Chief Minister ni bawk Tawnluia’n a hawng.
Dy. Chief Minister chuan District Research Office chu Mizoram sorkara Department pawimawh tak, Planning & Programme Implementation hnuaia awm a nih thu sawiin, department pawimawh tak, district-in a ken tel a nih thu a sawi a. Hna ropui tak thawktu, hmathlir thui tak sorkarin a neih theihna hnar pawimawh tak a nih thu a sawi.
Mizoram sorkarin mipuite hmasawnna ngaipawimawh mahse, hripui leng avangin harsatna tam tak an tawk tih Tawnlia chuan sawiin, sorkar laipui atanga sum hmuh tur Rs. vaibelchhe 3000 dawn an hmuh loh thu a sawi a. “Mipui intodelh theih na tur sorkar flagship program – ‘SEDP’ pawh hripui lengin tikhaihlak mahse, 1st phase-ah mi 60,000 tuam tawh niin, 2nd phase-ah mi 60,000 bawk tuam tum a ni a; September thla chhung hian sem chhuah hman tum a ni” a ti.
Tawnluia chuan Mizoram sorkarin mitin huapzo hmasawnna kalpuia, retheite khaichhuah chu a ngaipawimawh hle nia sawiin, hripui leng kara sorkar hmalakna ten rah tha a chhuah chho mek niin a sawi.
DRO hmunhma tur ngaihtuahtu Khawzawl Arro khawtlang te lawmthu hrilhin, Khawzawl mipuite chu inpumkhatna leh tangrual taka office hawn thar chu enkawl turin a chah a. Khua leh district hmasawnna thlentu ni ngei turin duhsakna a hlan bawk.
Sorkar thuchhuahin a tarlan danin Khawzawl District Research Office hi September ni 12, 2022 ah sak tan a ni a, May ni 12, 2023 ah sak zawh a ni. Rs. nuai 43 senga sak niin, chhawng hniha sang, square meter 227.43 a zau a ni.