Zote Toyota Mizoram Premier League Season 10 round 4-ah Aizawl FC leh Mizoram Police te an inkhel a. Club lian pahnih inkhelah 3-1 in Aizawl FC an chak.
Aizawl FC in squad tha tak an nei a, I-League club an nihna an chhawr. Nimahsela match thum an khelh tawhah phui lohna an nei leh thin. An inkhel hnuhnung berah FC Venghnuai nen an inhnehtawk a, chak thei an ni.
Police in chak an mamawh a, tawnhriat leh skill nei tha player tlarhmaah an ngah avangin goal khung an harsat lo. Mahse a hnung lam anni pawh a phui lo.
Police in minute 12-naah an khung hmasa zawk ta ngei a. F. Lallawmkima hmangin hma an hruai.
Aizawl FC tan tun season a nasa taka invawrh mek Lalrinzuala bawkin a hna ngai a chhunzawm. Minute 16-naah an si phurh a sut.
Second half-ah pawh Rinzuala tho a che leh. Minute 52-naah goal khungin a team in hma an hruai a. Minute 84-naah KC Larchhuakmawia’n an hnehna nemnghet turin goal thumna a khung.
Inkhel hnuhnung zawkah league hmahruaitu Chanmari FC leh an hnuai chiah a awm Chawnpui FC te an inkhel a. Goal inpe lovin an inhnehtawk.
Chawnpui goalkeeper John Lalruatfela chu man of the match a thlan a ni a, a team point khat hmuh theihna chhan lian tak a ni.
Karleh Ningani ah Aizawl FC leh Chawnpui FC an inkhel leh anga. Police in chawhnuah Chanmari FC an hmachhawn thung ang.