Netherlands in an khingpuite lakah first half goal vawi thum an khung a, Greece lakah 3-0 a chakin European Championship qualifier-ah point thum an hmuh belh.
Ningani zanah Eindhoven a Philips Stadion-ah hian mualneitu lamin coach Ronald Koeman hnuaia match li atanga vawi thum an tlawm hnuah kawng dik lam an pan.
An coach in team khauh zawk an nih a ngai tih a sawi hnuah Dutch team in an khauhna an lantir a, goal nawr lamah pawh an hlauhawm.
Minute 17-naah Denzel Dumfries corner pet chu Marten de Roon-a’n ram tana a goal hmasa ber ni turin a tauh lut.
Greece tlarhnung in Dutch forward-te an veng hneh lo thin viau a, minute 31-naah vengtu nei lo Gakpo chuan an goal hnihna a khung a. Dumfries bawkin a siamsak.
Minute 39-naah Dumfries siamsak atang bawkin Wout Weghorst chuan an goal thumna a tauh lut bawk.
Kheltha tak Dumfries hian minute 36-naah goal a khung teuh a, goal ban a pet per. Greek goalkeeper Odysseas Vlachodimos che tha bawkin Xavi Simons goal khung ngei tura ngaih tawh chu a kut khing khatin a lo dansak.
Inkhel dangah Denmark in San Marino 4-0 in an hneh a, an playmaker Christian Eriksen chu a langsar hle.
Eriksen hian Pierre-Emile Højbjerg leh Jonas Wind ten first half a goal an khung tur a siamsak a, Joakimi Maehle chuan goal khat a khung ve bawk.
Second half tawp dawnah Eriksen-a’n a phu ang ngeiin an goal hnuhnung ber huntawp hma hretin a khung ve leh a ni.