Mizoram Journalists’ Association (MJA) Hnahthial district hawnna nimin khan neih a ni a. MJA Gen Hqrs. President Zonunsanga Khiangte chuan hawnna neiin, hruaitu thar turte a puang nghal.
Govt Hnahthial College Auditorium-a MJA Hnahthial district thar hawnna inkawm neih a ni a. He hunah hian thu sawiin MJA President Zonunsanga khiangte chuan MJA chanchina rei tak hriat tur awm tawh lo, distirct hqrs-a inhlang kaia Hanhthial district din a ni thei ta chu lawmawm a tih thu a sawi a. District thar din ni tur chuan hmun pathumah inlungrualna a awm a ngai a, tunah buaina leh harsatna awm loa lungrual taka hawn a ni tur chu lawmawm a tih thu a saw
MJA President Zonunsanga hian, “MJA chu tlawmngai pawl, NGO ni loin eizawnna avanga a phuarkhawmte kan ni a. Chuvangin, member-te hi kan innel a, kan inngam tlak a, tumah kan inthlei bik lo a, tumah en hran kan nei lo. Kan nghet em em mai a ni,” tiin, journalist-te chu ni tina thil thar zira intuai hriam reng tur leh inchher hriam reng tur an nih thu a sawi.
MJA hian hnam inpumkhatna, chi leh chi inkara inngheih tlanna, intluktlanna leh inunauna a ngaih pawimawh thu Zonunsanga Khiangte hian a sawi bawk.
He hun hi MJA Gen. Hqrs Vice President Lalremsiama’n a kaihruai a ni. Gen Secy Zohmingmawia’n MJA din tan a nih dan te sawiin report a pe a. MJA Hnahthial district hi kum 2009 khan sub division anga din niin, lunglei district hnuaiah a awm a. MJA chanchina tun thlenga sub division a awm chhun a ni. Member paruk an awm mek a ni.
District thar hlanna hi Rev. TC Vanlalmalsawma, BCM Hnahthial South in a nei a. H. Lalthansanga, President, MJA Lunglei District; R. Lalremsanga, Deputy Commissioner, Hnahthial; Lalbiakkila, SP Hnahthial; C. Lalremruati, DIPRO, Lunglei leh F. Zosangliana, President, MJA Hnahthial District ten thu an sawi bawk.
Nimina hawn tak Hnahthial dist hi MJA dist hqrs pariatna a ni.
Hnahthial dist MJA hruaitu thar puan:
President : F Zonunsanga
V/Pre : C Lalbuatsaiha
Treasurer : H Lalthanghuta
Secy chu MJA dan bua inziak angin district president-in a ruat tura tih a nih angin president-in Rodingluaia a ruat tih a puang nghal.