Uttar Pradesh minister hlui pahnih, Swami Prasad Maurya leh Dharam Singh Saini te chuan Yogi Adityanath an bânsan tuk lawkah Samajwadi Party an zawm ta.
Assambly inthlan nan thla khat pawh a awm tawh lo tihin Zirtawpni khan eptu party hi an zawm a, Akhilesh Yadav chuan a lawm lut.
Minister hlui pahnih rual hian an ruala bâng ta BJP MLA panga – Roshanlal Verma, Brijesh Prajapti, Mukesh Verma, Vinay Shakya leh Bhagwati Sagar bakah rorel lai thlawptu, Apna Dal MLA Chaudhary Amar Singh te chuan Samajwadi Party hi an zawm bawk.
“Vawiin hian BJP tawpna thawm a ri a. Ram leh state-a mipuite dik lova hruaitu, BJP hian mipuite mitah vaivut an vawm a, an tiduhdah a ni. Tunah erawh tihral an ni tan a, Uttar Pradesh hi intihduhna lakah a zalen dawn,” tiin Swami Prasad Maurya chuan a sawi.
Mayawati-i kaihhruai, BSP-a awm thin, OBC hruaitu hriat hlawh, Maurya hian Nilaini khan ‘January 14-ah engkim a chiang ang’ tiin NDTV-in a hma hun tur an zawhnaah a lo sawi tawh.
Thawhlehni khan sorkara a nihna a bânsan a, BJP chu ‘hnam hnufualte harsatna hawisantu’-ah a puh a. A bânna chu ‘lirnghing’ anga sawiin BJP tawpna tur intana niin a sawi.
“Ka chhuah khan BSP a tlu a, keimah avangin BJP hi Uttar Pradesh-ah a kâng thung a. BJP tan hun a tawp tan,” a ti.
Saini hian a hla lawka BJP a chhuahsan dawn loh thu a sawi hnuah Ningani khan a bâng ve thung.
Maurya-a a bân hi mi dangin an zui tawk tawk a, darkar 72 chhungin MLA 10 zet chhuak tawhin minister pahnih an tel a. An zavai hian Yogi Adityanath-a sorkar chuan OBC a hlamchhiah niin an sawi hlawm.
Maurya hi Sagar, Prajapati leh Lal Verma ten an zui chhuak nghal a ni.
OBC hruaitu dang, minister tho, Dara Singh Chauhan chuan Maurya a zui a. MLA Awtar Singh Bhadana pawhin zui lehin ani hian Rashtriya Lok Dal a zawm hmel.
MLA dang – Vinay Shakya, Mukesh Verma leh Bala Avasthi te chuan Saini an zui chhuak a, Apna Dal MLA Amar Singh a bâng bawk.
Samajwadi Party boss Yadav-a chuan BJP hruaitu langsar bang apiang chu thla lakpuiin an party-ah a lo lawm tih Twitter-ah a tar lang zel a. Heng zingah hian minister pathumte pawh an tel.
Chief minister hlui, Yadav-a hi February-March inthlan turah BJP elpui ber tura inchhal niin OBC hruaitute hi a innghahna lian tur a ni.
Kum 2017 inthlanah khan BJP hian Yadav-a thlir loh lam, OBC chu nasa taka hminin an chak phah a. Tun tumah hian Samajwadi Party hruaitu hian a kalphung a thlak ve thung.
Zirtawpni chawhnua Yadav-a’n BJP hruaitu hlui mi pangate an party-a a lawmluh mek laiin Uttar Pradesh Chief Minister Yogi Adityanath chuan Gorakhpur-a hnam hnuaihnung, Dalit inah chhunchaw a fak ve thung.
Chief minister hi a MLA 10 leh amah thlawptu, Apna Dal MLA chuan tun kar chhungin an chhuahsan a. Yadav-a chuan sorkar hi bei zuiin an hnam hnuaihnung hlamchhiahin Samajwadi Party sorkara thleng ngai lo a thleng niin a sawi.
Hetih lai hian BJP sorkar chuan chief minister hian hnam tin hmasawn nan, thlei bik nei lovin hna a thawk niin an sawi ve thung.
Chief minister hian Dalit ina chaw a ei hi Twitter-ah tar langin, “Ang khata inenna chu a thang zel a, Jhungia-a Amrit Lal Bhartiji-a inah thil duhawm tak tak ka dawng a ni,” a ti.
Video thehdarhah chuan Yogi-a hi a ke khawkherhin a thu a, Bharti-a nena inhlat takin an thu.
&&&&&