Darkar 24 liam ta chhungin Jharkhand-ah ruah sur nasa kaihhnawih leh tek vangin mi pariat an thi tih Thawhtanni khan sorkar hotuten an sawi.
Jharkhand-ah hian Inrinni tlai atang khan ruah tam tak a sur a, kawr tam tam tichhiain lei pawh a min nasa hle a ni.
Pathianni khan Ranchi khawpuia Lalpur-ah, Hatma Saraitand vengah kawr te lianin mipa kum 28 a la a. Chotu tia an koh, Dev Prasad-a ruang hi tuiin a lakna atanga km 2.5 vela hlaah Thawhtanni tuk khan hmuh a ni.
“Tukin khan mi pakhat ruang hmuh a ni a, postmortem tih nghal a ni a. Pathianni khan ruah sur nasa avanga kawr lianin a lak a ni,” tiin Gonda police station in-charge Ravi Thakur chuan PTI a hrilh.
Pathianni vek khan Jamtara district-ah nu pakhat leh a fate pathum, kum khat leh a chanve leh kum sarih inkarte chu tekin a deng hlum niin police-in an sawi a. He chhiatna hi Chandadih Lakhanpur-a thleng niin Naryananpur police station in-charge Dilip Kumar chuan PTI a hrilh.
Bokaro district-ah hluma siam bang chim avangin naupang a thi bawk a. Hmeichhe naupang pahnih, kum kua leh kum 12 mite pawh Mayapur khua, Palamu district-ah dilah an tla hlum bawk niin police chuan an sawi.
Hmun tam takah kawr chunga dawh lei a la a. Ranchi-a Ratu-ah NH-39 pawh Pathianni zan khan tuihawkin a la a, Ranchi-Daltonganj kawngpui a kal theih rih loh va. State chhunga lui tam tak chu hlauhawm chhinchhiahna chin chung lamah a luang bawk.
Hetih lai hian Thawhtanni tuk atang khan Ranchi-ah chuan ruah a tlem tan a. Lohardaga, Gumla leh Simdega-ah te erawh zan thlengin ruah tam tak a la sur thei thung.
Ranchi Meteorological Centre in-charge Abhishek Anand chuan an state pumah ruah hi a la sur dawn niin a sawi.