Saudi Arabia rama mipate hnuaia nasa taka hmeichhiate an awmna thin chu thlahdul hret hret zel a. Tun hmaa an tih phal loh thin tam tak thlah zal a nih hnuah tunah chuan ram pawnah pawh, puitling chin chu mipate kaihhruai leh phalna tel lo pawhin an zin chhuak veleh thei dawn ta.
Dan thar hi nimin atang khan hman ta niin Saudi hmeichhia, kum 21 tling tawh chin chian mipate phalna la hmasa kher lo pawhin ram pawna zin chhuak turin passport an nei thei tawh dawn a. Hei bakah hian nau piang, inneihna leh inthenna lehkhate pawh an hming an ziak lut (register) thei ve tawh bawk ang.
Saudi-ah hian hun rei tak ata tawh hmeichhiate an chepin mipain an awp ber hneh hle thin a; mahse, an ram hmeichhia, ram pawna tlan chhuak tam tak leh mi dangten hmeichhiate zalenna rah beh a ni chu an bei ngar ngar a, a rah an hmu zel.
Rorelna fawng chelh mektu, Crown Prince Mohammed bin Salman chuan hmeichhiate zalenna tur thutlukna tam tak a lo siam tawh a, a langsar ber zingah nikuma hmeichhiate lirthei khalh phalna a pek pawh a tel.
Heng bakah hian hmeichhiate hnathawh pawh phal tawh a ni a. An hnathawhna hmunah pawh himna tha tawk tak pek an ni tawh a, mipa leh hmeichhia inthliarna ang chi chu hnathawhna hmuna tihlan reng reng rem tih a ni lo.
Hetih rual hian Crown Prince hian hmeichhiate dikna chanvo humhalha an tana beitu tam tak chu tun hnai thla eng emaw zat chhungin court-ah inlantirin a khak ve mek tho.