Chakma ram politics buaina

Kar hmasa lam atang khan Chakma ram politics vir vel chuan khawi lam nge a kawh dawn hriat lohin a inthlak kual char char a. Kar tawp a lo thlen chuan ZPM lamah an MDC te an vai luh dawn tih a lo thang a. Zpm lam pawh an phur hle a. CADC ah sawrkarna chang mai thei turin an inpuahchah nghal a.Lawmluhna programme thlengin social mediaah hmuh tur a awm a. Mahse, kar thar a lo nih meuh chuan Mnf lama an ngheh thu dawn zui leh a ni a. Kawng leh lamah chuan muihzatthlak pawh a tih theih hial awm e.

Chakma te hian kan ram politics ah englai pawh hian hmun pawimawh an chang emaw tih turin thawm hi an nei reng a. Congress party in an enkawl thiam ber emaw tih turin an chelh ding rei ber a. A hnuah mnf lamin an han chang leh deuh char char a. Mahse, nghehna leh politics a principle nei lova thĂȘn kual mai mai an nih avangin party tan pawh kawl an harsa hle tih hi a chiang a. An district politics hi ram leh hnam ngaihtuahna emaw, hmaswnna politics emaw awm chuang lo, pawisa leh thuneihna politics khel mai an nih avangin engahmah ngelnghehna an nei thei lova. Chakma politics hrechiang viau tura ngaih Zpm pawhin thu tak khukin an han khuk pui ve leh chu a ni a. Anni hian 2019 MP thlan khan CADC area a campaign loh law law kha an sawi hial khan a hriat a. Mahse, state ah sawrkarna siam an han tum meuh chuan chakma chu an hnar phal ta bik lo ani hmel e.

Chakma autonomous district council ah hian MDC thlan te a hau tak em em a. Sum politics ani ber mai a. Tu party pawhin sawrkarna chang se sawrkar an siam tuk atangin an in eiruk siak an ang deuh ber a. CADC huamchhungah hian development pawh awm mumal thei lo hial khawpa tawp an ni.

Tunhnaia an CEM hial eiruk thubuaia a tanna pawh kha anmahni leh anmahni Governor hnena inhek an ni a. Kan Governor khan a hektute kha sawrkar a siamtir mai dawn emaw an inti a. Mahse, an rin loh takin ACB lam a chhui tir ta a. Jail hial an tang ta a ni.

Han ngaihtuah vang vang hian helai politcs bawlhhlawh hi kan political party te hian a chhung siamthatna lam hawi an tum anih loh chuan sawrkarna va siam ngawt hian engmah thil tha a thlen lo ani tih hi hrethiam ve tawh se. Kan ram pum nghawng em em phak loah hian dah tum sela. CADC politics hian chakma bial dang nghawng tir lo hram zel tura hma la in han enkawl sela. Chakma bial dang nen chuti takin an tangrual bik lo tihte hi hrechiang se, hlauh nei lovin chakma policy hi han nei hlawm se a duhawm ngawt mai. Kan state a Sawrkarna chang party apiang hian chhut chiang sela, sawrkarma an siam hian chakma tel lo a ministry siam thei khawpin an tling tam ziah tih hi thudik a ni.

Leave a Reply

error: Content is protected !!