MNF Senior Vice President Tawnluia chuan khawpui laili atanga Assam Rifles sawn chhuak thei tura an inbuatsaih mek thu leh an chhuahsan ram chu mipui vantlang tana hman a nih tur thu a sawi.
MNF party chuan nimin khan kum thar atan Hnam Rûn hawnna inkhawm an nei a. He hunah hian thu sawiin, Tawnluia chuan Assam Rifles sawn chhuahna turin Laldenga hunah Zokhawsang hmun pek an nih daih tawh thu leh MINECO hi MNF sorkar hmasaah Assam Rifles ram chhuhsaka din a nih thu a sawi.
Deputy chief minister ni bawk, Tawnluia chuan, “Assam Rifles chhuahsan ram hi mipui vantlang tan liau liaua hmang turin MNF sorkar hmasa khan danah kan dah nghet tawh a. Assam Rifles-te hi chhuak thei turin an inbuatsaih mek zel a, an chhuak ngei ang,” a ti.
Mizo mipuite hmun tina awm leh state pawna awm rorelna pakhat hnuaiah dah hi MNF thil tum a nih thu sawiin, Tawnluia chuan, “Party dang anga lalna leh thuneihna ringawt uma lal theihna leh thuneihna um ringawt thei kan ni ve lo. Pathian hming lam chungin kan thawk mek zel a ni. Chak loh chang nei mah ila Pathian hmanrua ni turin kan kal mek zel a ni,” a ti a; Lalpa hming lam tlattu chief minister an nei tih hi a hrechiangtu a nih thu a sawi.
MNF party hian mi thar an lawm lut zel hian Zoramthanga kaihhruai sorkar MNF hian rin a la hlawh a, he hnam leh ram hruai tura rintawk a la hlawh tih a lantir thu a sawi a. “Pathian leh kan ram tan tih lungphuma hmangin MNF hi din a ni a, Pathian hming lam hmasain he hnam leh ram rawngbawl turin he party hi din a ni,” a ti bawk.