Mipate hian hmeichhia kan tluk thar leh a ngai?
Inrinni a tihchhuah tak Mizoram Electoral Roll 2022 ah mipa aiin hmeichhe vote nei an tam a, mipa aia an tamna hi sing hnih a chuang hial! Mipate tlem zelna chhan leh engkima hmeichhe chungnung chhoh tak dan hi ngaihtuah zui ngai tak a ni.
Ruihhloin nasa takin thalaite min run a, zirna thlengin hei hian a nghawng tih a chiang hle. Sorkar pisa tam zawkah hmeichhe thawk an tam zawk zel a, a thuneitu chin pawh hmeichhia an ni fur tawh bawk. Mizo mipate hian tan lak kan ngai a, kan ram mipate hian nasa taka intuaithar lehzual kan ngai hle mai.
Vote nei tharte nen Mizoram pumah vote nei mi 8,33,426 kan awm mek ta a, chung zinga mi 4,28,459 chu hmeichhia an ni a, mipa vote nei mi 4,04,967 an awm thung. Mipa vote nei aia hmeichhe vote nei tamna hi 23,492 a tling hial a ni. Naupiang zingah hmeichhia an lo tam zawk a ni thei e, mah se mipate hian kawng engkimah hnathawh kan uar a, kan hmeichhiate thlamuanpui tham tura ruihhlo kan bansan a, kan nun dik loh lai hi kan siam that deuh deuh zel a va ngai ta em.
Kum a vei zel ang a, nakinah chuan innghahna tlak loh mipa puitling kan tam zel ang tih a hlauhawm a, kan hmeichhiaten kan ram mipa duhkhawp lohna an nei lian zel ang tih a hlauhawm hle bawk. Kan chenpui hnamdangte hian mizo mipateah hian Mizo hmel an hmuh theihna turin tan la thar ila, ruihhlo kalsanin Mizo thinlung dik tak i siam thar leh ang u.
Hmeichhe hmasawnna leh hamthatna hrang hrangte hi zirtir nasat kan ni tawh a, tunah chuan thangharh zelin, mizo mipa te zawk hian hmasawn tum ve tawh ila, kan piang pung hluai thei lo a nih pawhin, damrei turin hriselna lam i uar ang u.