Congress Legislature Party (CLP) Leader Zodintluanga Ralte chuan Mizoramah ruihhlo a hluar zel chhan chu sorkarin ruahmanna tha a neih loh vang niin a sawi.
Nimina Aizawl Press Club-a thu thar thehdarhtute a kawmnaah Zodintluanga Ralte chuan tun hnaiah Mizoramah ruihhlo a hluar hle tih a sawi a. Damdawi hman khawloh avangin kum 2019 khan Mizo thalai mi 55-in nunna an chân a, kum 2020-ah mi 67, kum 2021-ah mi 47, kum 2022-ah mi 43 leh kumin September thla thlengin mi 47-in nunna an chân phah tawh niin a sawi.
Zodintluanga Ralte chuan damdawi hman khawloh avanga thalai eng emaw zatin nunna an chân tawh chung hian he harsatna chin fel a nih theih nan MNF sorkar chuan a do letna turin fund a dah tam lo va, ruahmanna tha pawh a nei lo niin a sawi.
Kum 2018 inthlan dawn khan MNF chuan ruihhlo ngaite enkawl kawngah hmalakna kalpui an tum thu an sawi a. Tunah an hun a tawp tep tawh a, ruihhlo lama harsatna ching fel turin hmalakna liantham an nei hauh lo nia sawiin CLP leader chuan, “MNF rorelna hnuaiah drug supply tihtawp aiin a pung zawk a. Substance abuse pawh thalaiah a nasa zual zawk bawk a. Nunna chân pawh an tam tial tial zawk a ni,” a ti.
Zodintluanga Ralte chuan state-a MNF sorkar leh central-a BJP sorkar hian dan lova ruihhlo tawlhruk an thunun theih loh avang hian MNF sorkar kum nga chhungin thalai nunna chân 259 an awm phah tawh a. Nikum khan heroin kg 152 man niin, kumin thla kua chhungin heroin kg 150 man a ni der tawh a. Mizoram thalaite tihchhiatnaah hian tu nge hlawkna tel a, tute nge ruihhlo sumdawnna hi kalpui a, eng vangin nge MNF sorkar hian a hriatfiaha a man theih hauh loh tih leh a remtihna hnuaia kal zawk em ni – tihte chu an zawhna a nih thu a sawi.
CLP leader chuan dan bawhchhiaa Myanmar atanga kuhva tawlhrukin kut hnathawktute nasa takin harsatna a thlen tih a sawi a. Chuti chung chuan MNF sorkarin kuhva smuggling titawp tura tihtakzeta hma a lak duh loh avangin kuhva smuggling a la kal reng nia sawiin, “Sorkarin hma a lak that duh loh avanga kuhva chingtuten an ei leh bar zawnna humhim tura anmahni kutkawiha hma an lak a ngai thinte hi a lungchhiatthlak tak zet a ni,” a ti.
Mi thenkhatin Congress sorkar chhungin Mizoramah hmasawnna a awm ngai lo tia an sawi chu thu dik lo leh belhchian dawn lo a ni tiin, “Aizawl tui lak phase 1 leh 2 te, tun hnai lawka hawn 37 MLD Water Treatment Plant te, Airport te, Medical College, Vety College, Horticulture college te pawh Congress sorkar laia din a ni a. Mizoram Hydel Project hmasa ber Tuirial Hydel Project te pawh Congress hunlaia din a ni. Mi rethei tam tak in kan saksak bawk,” a ti bawk.