Mualpho nawnna in an hmaah hmuak mahse a tawp dawnah Manchester United in an hmanlai zia an chhuah a, huntawp dawn hun pek belhah goal hnih khungin 2-1 in Brentford an lehthal.

Inrinni zana Old Trafford a inkhelah hian United in a zawnin mahni mualah league inkhelah a vawi thumna atan an tlawm dawn niin a lang hman. Goal khung lo se kum 1979 hnua hetianga an chetchhiat leh hmasak ber tur a ni dawn.

Fergie Time

Minute 87-naah manager Erik ten Hag-a’n a substitute siam theih hnuhnung ber ni turin Scott McTominay a dah lut. Inkhelh chhung zawngin Brentford tlarhnung a centre-half palian pathum awmte pumrua leh thahruiah an hneh lova, a player thahrui ngah a tir lut.

Minute 93-naah McTominay-a’n Alejandro Garnacho thawhrah atang goal hmaah ball a hmu a, a ke dinglam in tha taka la thla in a pet nghal a, Thomas Strakosha in a dang thei lo.

United an lawm a, minute tam awm tawh lo mahse chakna goal an la beisei. Anthony Martial-a’n an huntha a hloh ta nia a lan hnuah chance vawikhat an nei leh. Freekick hmu in an vawrh lut a, defender palian Harry Maguire-a’n ball a tauh rem chu McTominay bawkin minute 97-naah a tauh lut. Old Trafford thawm a ring.

United hian huntawp dawn lamah an si phurh an sutna goal nia lang chu pawm loh a ni bawk.

Lawm viau chi a ni em?

Red Devils in an manager ropui Sir Alex Ferguson-a hnuaia a tawp dawna an chak thin angin ‘Fergie Time’ ah hnehna an chang. Mahse Brentford lakah chak tura an nghah rei a ngai erawh an team dinhmun tilang chiangtu a ni.

Minute 26-naah goal an chhuah a, Casemiro ball hloh chu Mathias Jensen-a’n goal-ah a khung. Midfield tihsual bakah tlarhnungin ball an lekchhuah vat theih loh an tuar.

Si an phurh hnuah United in an mikhualte lakah football tha an khel hleithei lova, ball inchuh kawngah an pha lo.

Season hmasa a an player che tha ni thin Casemiro leh Marcus Rashford ten beisei an la pha lo zel bawk a. Brazilian midfielder hi halftime zawhah a lut tawh lova, Rashford pawh darkar khat bak a khel lo.

Kawng dik panna tura an result an hman dawn chuan an hmabak a la thui tho.

Manchester United boss Erik ten Hag chuan, “Kan season a hrilhfiah khawp mai. Bul kan tan pangngai a, tha ber ni lo mahse a chhe lo. Mahse goal chhuah loh tur kan chhuah a, kan tihsual niin thutlukna kan siam sual atanga intan a ni.”

“Si phur zawk nih hnuah kan theihtawp chhuahin kan bei a, kan beidawn loh rah a tawpah kan seng a ni.” a ti.

Blues tak tak an lang?

Chelsea pawhin season harsa an hman hnuah kawng dik an zawh niin a lang a. Raheem Sterling inlar zanah Burnley 4-1 in an hneh.

Turf Moor-ah Burnley in kum 18 mi French forward Wilson Odobert hmangin goal an khung hmasa a, Blues tan khua a dur leh dawn nia ngaihna a awm.

Amaherawhchu Sterling a inlar, a ball cross chu Ameen Al-Dakhil chuan an lamah a ti lut a, Chelsea in goal an nei.

Second half-ah a penalty hlawhchhuah chu Cole Palmer-a’n a khung a. Minute 65-naah an goal thumna aman khungin substitute Nicolas Jackson goal khung turah pawh a inrawlh leh bawk.

Thawhtanni khan Fulham an hneh bawk avangin Chelsea hian nikum October hnuah away inkhel a a zawna hnehna an chan leh hmasak ber a ni.

Chelsea boss Mauricio Pochettino chuan, “Ka player ten hnehna chan phu a an inpek avangin kan chak hi ka lawm hle.” tiin a team inpekna a fak.