Chief Minister Zoramthanga chuan Mizoram chu India rama leiba ngah tlem ber dawttu a ni chungin, eptu pawlten MNF sorkar chu beihna tur dang an hriat loh avangin ba tam berah an chhuah lui tlat niin a sawi.
Nimina Mizo Hnam Rûn chhung inkhawmah thu sawiin MNF president ni bawk, Zoramthanga chuan Mizoram chu India ram leiba nei tlem ber dawttu a ni chung hian, ba tam berah an chhuah lui tlat tih sawiin, “Min beitute hian min beihna dang hre lovin, ‘kalphung thar min enchhin teh u’ tih bak sawi tur dang an hre lo. A rei tulh tulh a, enchhin tum lo an tam tulh tulh a ni,” a ti.
Zoramthanga chuan ‘MNF-in independent sual lo’ tia puhtute hi an sual laia tel ve lo leh tel tluan peih lote an ni tiin, “Kum 1966-ah independent kan sual a, kum 20 chhung kan inkap,” tia sawiin, ram tan zalenna an sual lo ti thin mah se, hnam martar thlanmual heti zat a nei hian ram tan zalenna an sual chu a tichiang tih a sawi.
Health Minister Dr R Lalthangliana pawhin MNF chu party danglam bik, October 22, 1961-ah mi tlem tê-ten an din, a dintute pawh mi ropui bik ni chuang lo, Pathian thua innghat an nih thu a sawi a. Tun sorkar kum kal mek anga hun khirh bik an la tawng ngai lo a. A hun takah hun khirh laia kaihruai turin hruaitu tha, Zoramthanga hi Pathianin a pe niin a sawi.
Dr R Lalthangliana chuan roreltute hi enchhin chi an ni lo tih sawiin, “Tihfuh loh chuan kum hnih pawh a rei lutuk. Keini chuan kan tih mek leh tih tawhte atangin min teh se kan duh zawk,” a ti.
Mizo Hnam Rûn chhung inkhawm hun hnihnaah MNF President Zoramthanga’n an party-ah AMC chairman hlui, Zarzoliana bakah mi eng emaw zat a lawm lut a ni.