Congress party chuan kumin MLA inthlanpui lo awm turah an party-in sorkarna an chang a nih chuan lirthei hmanga eizawng pawl hrang hrangten harsatna an tawhte chin fel an tum thu leh an manifesto pakhatna, ‘Tang Puihna’ chhawpchhuahsak an nih tur thu a sawi.
Nimina Aizawl Press Club-a thu thar thehdarhtute an kawmnaah Congress Vice President Lalnunmawia Chuaungo chuan October 5, 2023 khan Congress party leh Mizoram Maxicab Association, Aizawl City Bus Owners’ Association bakah Two-Wheeler Taxi Association te nen hmaichhana inbiain inremna thuthlung an siampui niin a sawi.
Lalnunmawia Chuaungo chuan an sorkar chuan Aizawl City bus permit vawi khat chauh replacement theih ang tih chu an tihtawp tur thu inremna siamah tar lan a nih thu leh Mizoram Maxi Cab-te permit, one time replacement angte leh all Mizoram permit tihtawpte an ennawn tur thu te, a duhte tan chauh all Mizoram permit pek a nih tur thute a sawi.
Aizawl City bus tana ‘Wheel-Base’ 3400mm – 3600mm chungchanga harsatna tawh mek chu sorkar dan dinglai angin 25 seater a nih chuan lirthei eng company pawh an hman theihna tura ruahmanna siam an tum thu te, special road permit awlsam zawka lak chhuah theih turin ruahman a nih tur thu leh Aizawl khawpui chhung atan terminal changtlung tak hmun thumah siam a nih tur thu a sawi bawk.
Congress vice president chuan company thlan bik nei lovin MVI-in public service atana rinngam nia a ngaih company dang dang siam lirtheite chu maxi cab atana hman theih turin hma an lak tur thu a sawi a. “Commercial vehicle-tena ‘over-load’ chungchanga harsatna an tawh avanga lirthei neitute man leh pawisa chawitir thinte pawh tha taka dan zam chunga awlsam zawka tihsak an nih theih nan dan kan ennawn ang,” a ti.
Aizawla two-wheeler taxi permit chu sorkar mekin intam chhuah vek khawpin a pe chhuak a, intlan chhawk avangin an tuar nasa nia sawiin, “Intlanchhawk hi sorkarin a tul a ti a nih pawhin sorkar leh mi mal two-wheeler-te chauh intlanchhawk a nih theih nan ruahmanna siam a ni ang,” a ti bawk.
Lalnunmawia Chuaungo chuan two wheeler taxi tan khawpui chungah dinna mumal leh hmun remchang sorkarin an awmna municipal corporation nena thawkhovin buatsaihsak an tum thu te, lirthei pollution test-na pawh lirthei neitute tana awlsamna zawnsakin, oil depot remchangah dah tura hmalak an tum thu te, insurance chungchangah lirthei neitute tana a awlsam zawk nan Mizorama insurance company-tena regional office an neih ngei theih nan hmalak an tum bakah lirthei inlei leh hralha hming thlak muang leh buaithlak, fee sang bawk si chu siam that an tum thu a sawi.