ECI-in Mizoram Legislative Assembly inthlanna neiha vote tlate chhiar ni atana Pathianni a ruat chu Mizorama political party hrang hrangte chuan duh loin vote chhiar ni sawn turin an ngen.
Rorel lai, MNF party chuan nimin khan vote chhiar ni sawn turin Chief Election Commissioner hnenah ngenna an theh lut nghal a, an lehkhaah chuan vote chhiar ni atana Pathian biak inkhawm ni ruat a ni chu Mizo kristiante palzutnaah an ngaih thu te, Thawhtannia sawn turin an ngen tih an sawi a ni.
Mizoram Pradesh Congress Committee President Lalsawta pawhin nimin vek khan Chief Election Commissioner chu lehkha thawn nghalin Pathianni hi Mizoram mipuite ni serh a ni a, hemi ni hian official program leh sumdawnna chi reng reng pawh kalpui a ni ngai lo a; chuvangin, Pathiannia vote chhiar hi Congress party chuan tha a ti lo tih leh Pathianni lo ni dang ruat zawk turin an ngen tih a tar lang.
PC party pawhin vote chhiar ni atana December 3 (Pathianni) ECI-in a ruat chu an pawm lo tih an sawi a, vote chhiar nia atana Pathianni ruat chu Kristiante ni serh palzutnaah an ngai tih te, a rang thei ang bera vote chhiar ni atana ruat chu sawn leh turin ECI an ngen tih an thuchhuahah chuan an tar lang.