Election Commission of India (ECI) chuan nimin chhun khan India ram state pali – Madhya Pradesh, Rajasthan, Telangana leh Chattisgarh te rualin Mizoram State Assembly inthlanpui neih hun a puang a. Mizoram bikah chuan inthlanpui hi thawh khata neih zawh tura ruahman a ni.
ECI-in inthlanpui hun a puan hnu, nimin vek chawhnu dar 2:30 khan Mizoram Chief Electoral Officer (CEO) Madhup Vyas chuan I&PR Auditorium-ah thu thar thehdarhtute kawm nghalin member 40 awmna Mizoram State Assembly inthlanpui neih hun atan November 7, 2023 ruat a nih thu leh December 3, 2023-ah vote tlate chhiar a nih tur thu a sawi.
Mizoram CEO Vyas sawi danin October 13, 2023-ah inthlan hriattirna tihchhuah a ni ang a, inthlana chuh tumte tan hming pek luh hun hnuhnung atan October 20, 2023 a ni ang a, October 21, 2023-ah candidate hming en dik a ni ang a, inhnukdawk duh tan October 23, 2023 thleng hun hawn a nih bakah, December 5, 2023 hmaa inthlan kaihhnawih zawh fel vek tura ruahman a ni.
October 4, 2023-a electoral roll siam that hnuhnung berah Mizoramah vote nei mipa 4,12,969 leh hmeichhia 4,38,925 bakah service voter 4,973, a vaiin vote nei mi 8,56,868 an awm.
Aizawl district-ah voter 2,86,807 awmin a tam ber a, a tlemna ber, Hnahthial district-ah voter 16,294 an awm a. Assembly constituency malah voter ngah ber chu Lawngtlai district chhunga Tuichawng bial niin voter 36,042 an awm a. Lunglei district chhunga Thorang bial chu voter 14,909 neiin consituency mala vote nei tlem ber an ni a. Mipa vote tam zawkna district pakhat awmin assembly constituency 10-ah mipa vote tam zawkna a awm bawk.
Mizoram district 11-a assembly seat 40-ah polling station hi khawpuiah 525 leh thingtlangah 751 awmin, polling station awm zat chu 1,276 a ni a. Kum 2018 inthlanpui aiin polling station 112-in a zawk a. Assembly constituency tinah polling station pakhat tal hmeichhe hlang leh vohbikte enkawl din tum a ni a, model polling station pakhat zel siam tum a ni bawk.
Webcasting polling station za zela 50-ah leh critical PS-ahte siam tum a ni a. Vohbik leh kum 80 chung lam voter-te tan in lama vote thlak theihna siam a ni dawn a, hemi tur hian AC tinah Assistant Returning Officer i/c Home Voting ruat an ni a. Hmeichhe tana polling station hmeichhiaten an enkawl bik 95 a awm a, PwD tana siam polling station 11 a awm dawn a ni.
Eco-friendly election neih tum a ni a, inthlan venhimna thawk turin state police bakah CAPF section 450 chhawr tum a ni a. Election kaihhnawih sum hman viltu tur team hrang hrang ruat fel tawh a ni bawk a. Ruihhlo leh a kaihhnawihte khauh taka ven tum a ni bawk.
Mizoram CEO sawi danin Addl. CEO kaihhruai State Level Media Cell din niin district tinahte kalpui a ni a. Election official-te tan training hrang hrang kalpui a ni a. Vote tla a that theih nan SVEEP kaltlangin zirtirna kalpui mek zel a ni bawk a. EVM leh VVPAT First Level Checking zawh fel a ni a, ballot unit 2,035, vontrol unit 2,018 leh Voter Verifiable Paper Audit Trail (VVPAT) 2,021 te inthlanna atana hman turin venhimna khauh tak hnuaiah kawl mek a ni.
Vyas chuan ECI-in vote thlak hun a puan velah atangin Model Code of Conduct chu hman tan a nih nghal thu a sawi a, political party zawng zawngte leh sorkar officer-te pawh Model Code of Conduct hnuaiah hian khuahkhirh an nih thu leh voter-te duhthlanna tibuai thei zawnga chet lakna chi reng reng chu khap a nih thu a sawi.
Media-te chu inthlanna felfai leh dik neih a nih theih nana tih tur leh tih loh turte a tam thei ang ber puangzar tura chahin Mizoram CEO chuan, MPF leh NGO dangten election muanawm leh felfai tak neih kawnga theihtawp an chhuah thin chu fakawm a ti a. Mizo mipui vote nei tawh phawt chu vote thlak theuh tur leh vote thlak thatna ber ni tura thawhhopuiah a sawm a ni.
- Electoral Roll siam that hnuhnung ber, October 4, 2023-a tih chhuahah Mizoramah vote nei 8,56,868 (mipa 4,12,969 leh hmeichhia 4,38,925 bakah service voter 4,973) an awm.
- Aizawl district-ah voter 2,86,807 awmin a tam ber a, a tlemna ber Hnahthial District-ah voter 16,294 an awm.
- Assembly constituency malah voter ngah ber chu Tuichawng bial niin voter 36,042 an awm a. A tlem berna chu Thorang bial niin, voter 14,909 a nei.
- Polling station zingah Aizawl East I bial chhunga Zemabawk VIII PS-ah voter tam berin 1,481 an awm a. Thorang biala Thehlep PS-ah tlem berin, voter 26 an awm.
- Kum 18-19 inkar, young voter 50,611, senior citizen voter (80+) 8,490 leh PwD voter 3,243 an awm bawk.