Huntawp dawnah Liverpool in an si phurh sutna goal khung mahse video assistant referee hmanga endik hnuah pawm a ni lova. Europa League inkhelah sawi hlawh takin Toulouse lakah 3-2 in an tlawm.

Ningani zana Stadium Municipal a inkhelah hian huntawp dawn hun pek belhah Reds tan Jarell Quansah chuan point khat an hmuh theihna tur goal a khung a. Mahse goal luhna turah Alexis Mac Allister handball avanga pawm a ni lo.

Quansah hian penalty area a goal hma a ball a nan fuh chu a pet lut a. Liverpool an lawm. Mahse Bulgarian referee Georgi Kabakov chuan goal a a pawm vek hnuah VAR screen atang endik tura tih a ni a. Liverpool in chance an insiam hma in Mac Allister-a awm leh ban a fuh tih hmuh a ni a, goal a pawm a ni lo.

Inkhel pumpuiah erawh Toulouse in point hmuh ngei an phu a, hun tam zawk chhunga kheltha zawk an ni.

First half-ah Aron Donnum hmanga goal khungin second half-ah Thijs Dallinga chuan an goal hnihna a khung a. Liverpool in Cristian Casseres Jr. own goal vangin goal khat nei mahse Frank Magri chuan French club goal thumna a khung zui leh a ni.

Substitute Diogo Jota in Liverpool beiseina siamin minute hnih a la awmin goal a khung ve leh a. A tawpah erawh a vanduai zawkah an tang ta tho.

Liverpool boss Jurgen Klopp chuan, “Kan goal thumna kha goal ngei a ni in ka ngai. Handball an ham kha a thlenna a hla a, khami hnu khan inkhel a kal thui leh tawh.” a ti a.

Inkhel chungchangah erawh, “Ball kan hloh hnem a, ball inchuhnaah kan tim zawm thin. Tihsual pawi tak tak a ni. Ball kan chan hnem avang khan chance tha zawk siam nual tur kan ni a, chutihrualin helai hmunah goal thum chhuah a thiang lo. Keini aiin an inpekna a sang a, chak an phu.” a t.

Seagulls leh Hammers

English club dang inkhel zingah Brighton & Hove Albion in knockout stage luh inbeiseina mei an ti nung zel a, Ajax lakah 2-0 in an chak.

Amsterdam a inkhelah hian Roberto de Zerbi pawlte tan Ansu Fati chuan an goal hmahruai a khung a. Second half-ah a goal khung tur siamsak tur Ivory Coast winger Simon Adringa goal khung tur a siamsak let ve leh a ni.

Ajax in team naupang tak khelhtirin Brian Brobbey-a’n goal ban pahnih a pet per chu an goal khung teuh ber a ni.

De Zerbi chuan, “Kan result leh kan inkhelah ka lawm hle. Kan fans te ka lawmpui. Result lungawithlak a ni a, a aia tha erawh ka beisei reng.” tiin a sawi.

West Ham United in knockout stage lut turin khelh hnih an la hmabak atang point hnih bak an mamawh tawh lo.

London Stadium-ah Lucas Paqueta chuan goal khungin Greek team Olympiakos lakah 1-0 in an chak.