Ruahman dan chuan tunkar tawp lamah US pan tur a ni a, mahse boruak awmdan leh a dinhmun enin thil tih theih loh a ni dawn ta reng mai. Gospel singer lar Sailova’n Covid-19 a kai a, hrilang leh khuhin tlak buakin, In lamah a inenkawl mek.
A nat tan dan
“Ka inhmuhchhuak tak chu January 18 khan a ni. Ni 16&17 te khan ka thin (heart) hi a rawn phu leh dut dut thin a, ka hah phian thin bawk a. Mahse, ka ti hram hram a, ‘Intihharh deuh ka ngai a nih hi a..’ ka ti ve satliah mai. Gym zo ka haw chho te hi ka hah em em a, nidang a ang lo,” tiin nimin tlai khan Sailova’n Thalai Times a hrilh.
Hemi ni vek hian Doctor entir tum a ni a, mahse Ragt test a ngai a, a chenpui a U a positive tih an hmuchhuak bawk nen.. chhungkuaa in test vek a tul tih hriain, Sailova hi LRM lamah FIA a ti a, a postive tih a hre ta a ni.
Enfiah ngai a awm!
“Ka mut chiah hian ka lungphu hi a rang leh thin a, Lung lam dik lo te a awm thei a, hei pawh hi enfiah thuai a ngai dawn. Tun dinhmunah chuan hri-tlang leh khuh hi a langsar deuh a ni mai a, lung phu zawih zawih kha a zia ve viau tawh. Mut chiah hian tháwk (breathing) hi a la pangngai lo tih a chiang bawk,” tiin a dinhmun dik tak a sawi bawk.
Tihngaihna awm lo
Heti ang hi a nih avangin January 28-a US pan tura a inbuatsaihna pawhin awmzia a nei thei dawn lo.
February lama sawn hlat emaw a dinhmun a zira siam rem turin khu lama awm te nen remruatna an siam.
Lalpa chungah lawm
Pathian zarah khawsik te, rim hriatna bo tihte, taksa na \hum tihte ka nei lem lova kan lawm khawp mai. Chutih laiin, ka lungphu lam rawn buai leh deuh nawk avanga hah leh chauh deuh rawih hi ka nei tam ber a, âwmna khuh hnawk leh hritlang nasa lutuk lo tawrh ngai ve hle rauh si hian min tlakbuak tel bawk.
“Engpawh nise, Damdawi In em thlen ngailova ka awm hi Lalpa chungah ka lawm em em e. Bible chhiar a fianrial neih nan hun ka hman tam phah a, ka lawm a ni.
“Ka dam leh veleh a ka Lalpa chanchin tha nasa zawk a puang turin ka rilru te chu ka ti chak sauh sauh va.
“Mihring hi Pathian kut a awm kan nih zia leh VAN in tum a neih tawh chuan lo dal ve tur hian chakna kan neih leh hriselna kan neih hi eng-mah lo mai a lo nihzia ka hriat tawh te kha ka chiang thar leh ta a, ka lawm takmeuh meuh a ni.
“Ka lungphu a phut dan tur speed baka tlêm a rang a, minute khat lek he hri avanga a han phut ran hlek pawh a ka taksa chakloh hmazia leh hlauh thawnna in min tlakbuak hmazia te ka ngaihtuah in, KAN MAMAWH BER CHU LALPA, LEI LEH VAN SIAMTU chauh hi alo ni tih hi ava chiang em!
“Chapo tur pawh hian hrisel that hi a lo ngai hle a lo ni a, chuvangin, Khawngaihna avang chauh a chapo thei mai kan lo ni zawk tihte nen lam ka ngaihtuah chhuak a, A nilo zawng hian he KHAWNGAIHNA hi kan lo va hmang kual nasa dawn em…
“Engpawh nise, USA kal hun pawh tun thlaah ka theih dawn tak loh avang in february thla laihawl lamah ka sawn a lo ngai ta a. Post covid la na lova hrisel tha taka ka kal theih nan min lo tawngtaipui dawn nia.
“USA ka kal chhan tur hi kan unau raltlante pual a concert nei tura kal tur ka ni a, he hna hi hna pawimawh tak a nih avangin thulh ka hreh tak meuh meuh a ni.
“Lo him ula, lo in enkawl tha ang che u..”