Tlawng lui luangin lei a lak avanga harsatna thleng thin avangin kum 1970 atanga tun thlengin Bairabi hmun thenkhatah in 80 vel a chhe tawh.
Tlawng lui luangin lei a lak avanga Bairabi hmun thenkhata harsatna thlen thinna hmun hi nimin khan bialtu, Minister of State K Lalrinliana’n a tlawh a. PWD-a thawktute leh Bairabi khawtlang hruaitute kawmin, harsatna sukiang tura hmalak dan tur te a sawipui.
Bairabi Joint VC chairman R. Lalrinawma’n kum 1970 atanga tun thlengin Bairabi hmun thenkhatah Tlawng luiin lei a lak avangin In 80 vel a chhe tawh niin minister chu a lo hrilh a. Tlawng luiin lei a lak avanga in chhia te chu mi mal in bakah sorkar quarters, biak in, school leh naupang enkawlna home-te pawh a tel thu a sawi.
NABARD sum Rs. nuai 1,000 hmangin lui kama lei tlak belh tur dalna anti-erosion work Phase-I, KM 1.2 a thui siam tura hmalak mek a ni.
K Lalrinliana chuan nimin vek khan a MLA fund hmanga sak Meidum-a community hall leh Meidum Volleyball Association leh VC tangkawpin an siam volleyball court a hawng nghal a. Bairabi South-a futsal khelmual siam mek te, Meidum football field laih mek leh Meidum thlamual thar hmun tur te a tlawh nghal bawk.