Kawngpui tawt tihziaawmna tur hmuh thuai a chakawm
Aizawl khawpui a tawt zel a, lirthei nei leh awmchilh kan tam telh telh bawk. Kawngchhawng siam hleih theih a la ni lo a, kawngpui zauh ngaihna a la awm rih lo bawk. Sorkar in theihtawpin ngaihtuahna a hmang tih zawng kan hriat a la ni rih zel a, hmasawnna hmel hmuh tur a awm thuai beisei zel phawt ang.
Hetih lai hian zirtawpni liam ta khan Aizawla kawngpui tawt tihziaawmna tur, Asian Develoment Bank (ADB) sum US $ maktaduai 4.5 senna tur project, Aizawl Sustainable Urban Transport Project (ASUTP) thawktu tur, Mott MacDonald Cunsultancy Firm Pvt. Ltd., aiawhten Chief Minister Zoramthanga hmuin project chungchang pawimawhte an sawipui a, hmasawnna hmel kan hmu chho dawn niah pawh a ngaih theih awm e. Hmalakna hmel hmuh chhoh thuai thuai hlan a nghahhlehawm tawh hle.
Mihring kan pung zel a, kan mamawh a sang chho ve zel bawk. Khawpui tih len a, siam danglam chhoh zelte pawh hi a la ngaiin a rinawm a, kawngpui berin min zawh loh chuan a tihngaihna tak a awm bawk si lo. Tuna hnathawktu turte nena kan ram hruaitu lu ber inbiakna hian rah tha chhuah chho zel se la, a hlawhtlinna awm chho thuai bawk teh se.
Sorkar thuchhuahin a tar lan dan chuan October 26, 2021 khan sorkar laipuia finance ministry hnuaia economic affairs deptt-in US $ maktduai 4.5 hu project readiness financing (PRF) loan puk turin ADB chu inremna a ziahpui a. He loan hi ASUTP atana ruahman niin, Aizawl khawpui chhunga kawngpui tawt lutuk vanga lirthei chetvel harsatna sutkianna tur project niin, a thawk turin Mott MacDonald Pvt. Ltd. chu thlan an ni. Kawngpui tawt hi eng sorkar pawhin chinfel dan ngaihtuah chhunzawmah nei zel bawk teh se.