Kolasib district-a hriselna dinhmun enfiah leh inentirna (clinical establishment)-te dan anga chhinchhiah leh khuahkhirh kawnga hma la tura din District Registering Authority (DRA) chu nimin khan an Chairman, Kolasib Bawrhsap John LT Sanga hovin an ṭhukhawm a. He thutkh- awma tarlan a nih danin, Kolasib district-ah sorkar hriatpui clinical establishment 33 a awm mek.
CMO office, Kolasib-in a chhinchhiah danin, Kolasib district-ah sorkar hriatpui clinical establishment 33 a awm zinga 7 chu government establishment (District Hospital, Community Health Centre leh Primary Health Centre) niin, a dang 26 chu mimal din (private) laboratory leh clinic te an ni.
DRDA thukhawm chuan Kolasib district-a an hmalakna tur hrang hrang te an sawiho a. Clinic leh laboratory provisional registration nei tawh sa te chu DRA hnuaia registration puitling nei thei tura danin a phut ang hlen chhuah nan kum 2 chhung hun pek an ni dawn a. Provisional registration la neilote chu thla 6 chhung hun pek an ni dawn thung tih sorkar thuchhuahin a tarlang.
Kolasib DRA chuan sorkar hriatpui loh leh dan anga taka dinhmun endik leh damdawi cha- wh phalna neilote lakah fimkhura, chuti ang chu pan lo turin Kolasib district mipuite an chah a ni.
Sorkar laipui dan siam, The clinical establishments (registration and regulation) act, 2010 behchhanin Mizorama clinical establishment-te chhinchhiah, khuahkhirh leh vil zuina tur, The Mizoram clinical establishments (registration and regulation) rules, 2014 chu Mizoramah hman a ni tih sorkar thuchhuah chuan a tarlang a. Mizoram sorkara Health & Family Welfare department Commissioner & Secretary aṭanga lehkha dawn bawhzui leh Mizoram CE (R&R) Rules, 2014 Section 4(1) tlawh- chhanin Kolasib Bawrh- sap John LT Sanga chuan Kolasib District Registering Authority chu November ni 16, 2023 khan din tharin, nimin khan ṭhutkhawm hmasaber chu koh a ni ta a ni.
Kolasib DRA Chairman John LT Sanga chuan DRA tih tur leh thuneihna tlangpui sawiin, ṭhutkhawm koh chhan te a sawifiah a. Mihring taksa hriselna dinhmun enfiahna (laboratory) chu natna chungchanga inenkawl zui zel dan tur hriltu a nih avangin a pawimawh hle tih sawiin, mihring himna leh hriselna khawih a nih angin clinic leh laboratory-te chu fimkhur taka kalpui a ṭul thu a sawi.
Clinic leh laboratory-te khuahkhirh leh vil zui tura din DRA chuan thuneihna leh mawhphurhna sang tak a neih thu Bawrhsap chuan sawiin, member-te chu tihtak zeta an mawhphurhna hlen chhuak turin a chah a. Thih leh dam inkar hriltu a nih theih avangin, mihring himna dah pawimawh hmasaber chunga danin a phut anga clinic leh laboratory te kalpui zel turin Kolasib District chhunga clinic leh laboratory enkawltute a chah bawk.
Kolasib District chhunga laboratory-te tan kar hmasa lam khan minimum standard training buatsaih a ni tawh a, laboratory ten chhinchhiahna an tar tur te, himna tura zawm tur te, faina leh thianghlimna kawnga zawm tur te, khawl enkawl dan tur te, thawktute thiamna ngai chin leh thil pawimawh hrang hrang te an zirho a ni.