Kan ram thenawm Myanmar buai chu a sosang thar leh a. Mipui sipai lam an che tha chho tan niin a lang bawk. Kar kalta zirtawpni khan Chin hills defence force hotu pakhat chuan hnehna an chan tawh thu Tiau ah sawiin tunah chuan raltlan zawng zawng tan thlamuang takin a rawn haw theih ta e. Sual sipaite chu kan hneh tawh a. Kan ramin a mamawh vek che u a, refugee zawng zawng lo haw tawh rawh ule ati a ni.
Myanmar ram buai dan leh chumi in mizoram min nghawng dan chu tumah in hrilh ngai lovin kan hre vek a. Tuna an buaina ngawt hi kan harsatna ani lo a. Hun rei tak kal tawh atang khan Myanmar buai hi kan tuar thin a. Hun reilote chhung an buaina a reh zawk chhung pawh khan mi ina awmpui tur thlengin an vang duak anih kha. Refugee lo lutte buaipuiin a ram buaiin kan buai a. Ram pumah thawhlawm kan khawn a. Mahni theihna mual theuhah theih tawp kan chhuah a. Chutih laiin central lam sawrkar lah chuan kan sawrkar chu Burma refugee nawr kir turin a lo vau sek a. Kan CM in huaisen taka kan unaute kan nawr let theih loh thu a sawite kha a lawmawm takzet zet a ni. Khawvelin unau kan nihna hi min pawm pui deuh deuh phah ani tih pawh hi an hriatchian phah hle.
Myanmar buai hi a state ang mai pawh nilovin India hian a la buaipui chho mek a. Refugee avanga buaina in manipur a nghawng dante pawh India hian a hrechiang a. An buaina hi India tan ngawihsan ngawt theih ani lo tih pawh a hrechiang hle. Myanmar ram a fel chuan India hmarchhak buaina hi thui tak chinfel theih anih a rinawm bawk. Buaina lam ngawt nilovin, India sawrkar hmalakna a south east asia thlunzawmna tur kawngpui laih mek pawhin a tuar a. He hmalakna, India tana hlawkna nasa tak siamtu tur pawh hi an buaina avang hian hma a lak chak theih loh a. An sawrkarin hna a thawk chak thei lova. India tan sum sen thlawnna pawh a nasa hle.
Heng thil hrang hrang han en hian Myanmar buaina hi India hian tih tak taka chinfel pui a tum a ngai ta hle a. Khawvelin sipai sawrkar hi an duh lo vek thin. Khawvela democracy ram lian ber India hian sipai sawrkar chu a thlawp ngai dawn lova. Tuna democracy sawrkar din duhtute hi India hian a ngaihven a, sipai sawrkar paihthlakna kawnga a puih ve a, Democracy ram tha tak a lo nih theih nan, tun hi India tan chet hun a va ni bawk em. Myanmar a fel chuan India hmarchhakah inzawmna tha tak kan nei ang. Chu chuan India ram tan hmasawnna nasa tak a thlen ngei ang. Central sawrkar hi Myanmar buainaah hian a thlirtu ni tawh lovin, a chingfeltu nise kan va duh tawh em. Chu chuan kan rama refugee harsatna tih vel mai mai chu a chingfel nghal bawk ngei ang.