3rd Division Screening Tournament final-ah Inrinni khan ILMOV Cricket Club chuan Ramhlun Venglai Jr. Cricket Club chu run 20 in an hneh.
Durtlang Playground a final inkhelah hian ILMOV ten over 20 chhungin run 116 an siam a. Richard Zosangliana chu run 37 siamin a team tana siam hnem ber a ni a, midang pali in run 10 aia tam thawhin bat hmangin an tangrual.
Ramhlun Venglai Junior tan Zonunsanga chuan run 43 siam mahse ILMOV bowler Indra Kumar Chhetri leh Vishal Jaishi te an che tha a, wicket thum ve ve an la in over 19.1-ah RVL Jr. team an vawm out zo.
Final khel team pahnihte hi season tharah 2nd Division-ah an kaisang ve ve.
League round-ah team pahnihte hi Group B-ah awmin Ramhlun Venglai hi khelh 7-ah vawi sarih an chak a, hma hruaiin vawi 6 chak ILMOV in an dawt. Group pahnih a sang pahnihten Super Four an khel leh a, vawi khat theuh an inkhelh kual hnuah Ramhlun Venglai Junior vawi 2 an chak a, ILMOV hi vawikhat chakin vawi khat tie result nei an ni.
—
Mixed martial arts khawvela hnek na ber a ngaih, UFC heavyweight champion Francis Ngannou chuan knockout chauh ni lo a thiam tih a pholang a. Amah chotu Cyril Gane chu UFC 270-ah chhuatah thununun hnehin unanimous decision in a hneh.
Anaheim a UFC 270 main event-ah palian zinga ‘technical fighter ‘ tunhnaia tha ber zing ami Gane hi interim champion lai niin vawi 10 a fight tawhah a la chak vek a. Pathianni zinga an inbeihnaah pawh hian a thiam hi hmang tangkai in ‘game plan’ tha a nei a. A chet ran zawk leh ‘leg kick’ hmangin Ngannou kut a thlak fuh ngun a. Champion lai in knockout theihna hun hmangin round hmasa pahnihah kut a thlak tam lo.
Round thumnaah Ngannou hian a insiamthat loh chuan point hmangin a tlawm thei dawn tih a hria a. A chak lohna nia sawi thin chhuata inbeihnaah Gane hi luhpui thutin a thunun tluan.
Training laia khup ti na chungin Ngannou hian wrestling leh Brazilian jiu-jitsu a hmang tha hle a. “Chhuata inbeihnaah hma ka sawn zel a, khingpui hautak a ni dawn tih ka hria a. Chuvangin chiai miah lova chhuata luhpui ka thiamna kha lantir ka tum.” tiin a chak hnuah a sawi.
UFC 270 neih dawn boruakah Ngannou hmalam hun in sawi a hlawh a, UFC-ah contract ngai hman a tum tawh loh thu a lo sawi tawh. A hmalam hun zawhna chhangin, “Boxing hi ka rilru a awm reng thin a ni a, ka vanglai a zawh hma a tih ve ngei ka duh a. Hunin min nghah dawn loh avangin ka ngaihtuahnaah a awm ve ang.” a ti.
Figueiredo phuba
Flyweight title inchuhna hmuhnawmah a vawi thum nan Deiveson Figueiredo leh champion Brandon Moreno ten fight hmuhnawm an lantir a. Tun tumah Figueiredo hian a title chhuhsaktu Moreno hi unanimous decision in a hneh.
Vawi khat ve ve chak a, draw an neih bawk hnuah Figueiredo chuan, “Vawiin hi ka ni a ni a, Brandon-a hnenah lawmthu ka sawi. A vawi li na chu an ram Mexico-ah ni rawh se.” tiin a sawi.