Vaivut thli hlawm lian tak maiin Australia chhimchhak lam a tuam mek a, nimin kha chuan khaw awm dan pawh a tidanglam nasa hle a, van pawh serthlum rawng vekin a lang a, boruak a tichhe nasa hle bawk.
Thuneitute chuan Sydney khawpuiah vantlang tan a him lo tih an puang a, 500km bial vel vaivut thli hlawmin an khawpui a tuam niin an sawi a, thlawhna thlawk pawh a tibuai nasa hle.
Hmun tam takah khaw chin hmuh theih pawh a tawi hle a, New South Wales (NSW)-ah pawh khua a hawi theih mang lo.
Thuneitute chuan he vaivut hi thli chak takin lei ro a chhem atanga awm niin an sawi a. August thla atanga NSW pum khawkhengin a tuam nghawng niin an ngai bawk.
Damdawi lam thiamte chuan mi eng emaw zat thawk lama buai leh thawhah an awm der tawh tih an sawi a. Hriselna lama thuneitute pawhin in chhungah, a bikin naupang, thawk lama harsatna nei leh tarte phei chu pawn chhuak lo turin an ti.
Mi thenkhat chuan thli a na em em bawk tih an sawi a, car-a chuan pawhin tukverh hawn hlek chuan vaivutin a luhchilh nghal zel niin an sawi bawk. Khua a hmuh thui theih loh avangin tlan chak ngam a ni lo bawk tih an sawi a ni.
Sydney khawpuia hian vaivut thli tleh mek hi kum 2009-a hetiang deuh bawk an tawrh tum nen khan an khaikhin mek a. Kha mi tum pawh khan mi za tel chu thawkna lam harsatna neiin damdawi inah an luh phah a ni.