India rama hnuchhuitu pawl, National Investigation Agency chuan India hmelma, India-in a man duhte list, ‘Most Wanted list’ thar a tichhuak a. Hming langsar zingah Lashkar-e-Taiba hotupa, Hafiz Saeed te; Hizb-ul-Mujahideen hotupa, Syed Salahuddin leh 26/11 beihnaah bultumtu ber, Zaki-ur-Rehman Lakhvi te chu an tel a. Luman nei sang ber erawh Telengana-a Maoist hel pawh hotupa a ni thung.
NIA-in list a tihchhuah thar hi mipuite hriat theih turin Twitter-ah an dah chhuak a, ‘most wanted fugitives’ an ti a. NIA chuan an chinchang hria emaw, man theih dan tur hria emaw chuan email hmangin, assistance.nia@gov.in emawa, 011-24368800-ah emaw biak theih an nih thu an tar lang.
List thara hming lang 258 zinga 15 vel chu hmeichhia an ni a. A tam zawk hi Interpol pawhin man an duh an ni hlawm a. NIA chuan India rama ‘firfiaka che thin’ tih te, ‘helho train-pui thin’ leh ‘puak thei thil kam thin’ tiin a sawi hlawm.
Lang zingah hian Maoist an tel nual a, anni hi ‘India sorkar phiara indona thlentu’ leh ‘ralthuam leh pawisa tam tak kawl’ tih an ni.
Hming lang zinga 98 hi Red Corner Notice an tih, hmuhna hmun apianga man theih nghal an ni hlawm.
Mi 57 chu luman nei an ni a, an zingah hian Mupalla Lakshman Rao, Ganapathy tia an koh thin bawk chuan luman Rs Nuai 15 zet neiin a sang ber a ni.