Aizawl: Bairabi leh Sairang inkar rel kawng siam hnathawktu, RL Construction company-in a chhawr hnam dang mi pahnih chu an hnathawhnaah leiminin a delh hlum.
Kawnpui atanga thudawn danin, RL Construction company hnuaia hnathawkte chuan nimin khan Kawnpui Rel Station tur bul kawng chhak lama leimin chu an thian fai a, Hitachi hmangin lei tla hi then phawt a nih hnuah khawl hnathawh bak, mihring thaa lei an laih rem laiin chawhma dar 10:30 vel khan a chhak lam ko pang chu a min thut a, hnathawktu mi panga zinga pathum chu lei min hian chhilhin pakhat chu chhanchhuah hman niin, mi dang pahnih erawh lak chhuah an nih hnu, Kawnpui damdawi in panpui an nih laiin an boral ta a ni.
Leiminin a chhilh hlum takte hi Dipak Datta, kum 27 leh Durga Prasad Passi, kum 57, Nagaon district, Machaka, Assam-a chengte an ni.
He chhiatna thleng chungchangah hian Kawnpui Police Station-ah UD Case ziah luh niin, ruang pahnihte hi Kawnpui CHC-a post mortem an nih hnuah vawiin tlai vek khan an khua panpui nghal an ni.