Chelsea chu Napoli winger Khvicha Kvaratskhelia ngaihventu club zingah an tel ve ta a, lakluh theih dan tur uluk takin an dap.
Manchester City, Real Madrid, Barcelona leh Newcastle United te chu kum 22 mi ngaihventu zingah hian sawi an ni fo thin a. Tunlai European football a forward ngaihven hlawh Kvaratskhelia hian season liamta khan Napoli tan match 43 khelin goal 14 a khung a, assist 17 a nei. Partenopei hian kum 1990 hnua a vawikhatna atan Serie A title an chawi leh theih chhan lian tak a ni.
Chelsea hian neitu thar hnuaia an awm hnuah player bazar a an chetdan an tidanglam a, Kvaratskhelia hi an umzui a nih chuan tunhnaia player kum lama naupang, hmabak eng tak nei a ngaihte lakluh an tum chhunzawmna zel a ni ang.
Nimahsela Georgia winger hian Napoli hnenah kum 2027 thleng contract a neih avangin a club lamin na taka chelh tumin an tang thei dawn a. Hei chauh hi ni lovin contract thar lian zawk ziahpui tumin inbiakna an kalpui tan tawh bawk.
Europe chanchinbu thenkhatte chuan Kvaratskhelia manah hian Napoli in Euro maktaduai 100 tal an beisei dawn a. Hei hi Chelsea tan thil huphurhawm ni lo mahse UEFA hnuaia Financial Fair Play dan an zawmna turin an insiamrem phawt a ngai tawh dawn.
Hei bakah hian nakkum player bazar a an sum neih dan tur hi tun season-ah Europe huap inelna a tel turin an tling thei ang em tihah a innghat thui hle dawn bawk niin an sawi.
Blues hian player bazar-ah hian position danga mamawhte an nei ve tho bawk a, striker rinrawl ni tur lakluh an duh a. Heng zingah hian Kvaratskhelia khelhpui Napoli striker Victor Osimhen chu a tel a, ani bakah Brentford striker Ivan Toney pawh sawi tel a ni.