Consumer-ten sumdawngte laka harsatna an tawha thubuai an put luhna, Consumer Disputes Redressal Commission, Aizawl District chuan kumin chhungin thubuai 40 a dawng tawh a, thubuai an khawih tam ber chu insurance chungchanga harsatna a ni.
Consumer Disputes Redressal Commission-a thawktuten an sawi danin kuminah complaint 40 an dawng tawh a, chung zinga 25 chu chin fel tawh a ni a, tunah hian kumin leh kum hmasa lama complaint lut thubuai la chin fel loh hi 50 bawr vel a awm mek a ni.
Thawktuten an sawi danin complaint an dawn zinga tam ber chu insurance claim kawnga harsatna a ni a, a dawtah chuan courier services chungchanga harsatna a ni a, post office kaltlanga bungraw chah bothlau chungchangah pawh complaint lut a tam a, internet kaltlanga bungraw lei, an thil chah hmu ta lo leh an chah ang ni lo bungraw chhe tak dawn chungchang te pawh complaint lut a tam a ni.
Consumer Disputes Redressal Commission hotute chuan mipuiten commission-ah zualko nachang an hre chho zel tih an sawi a, thil ti dik lotute chu the Consumer Protect Act hnuaiah pawisa chawitir leh lung in tantir thlengin hrem theih an ni tih te, thubuai an chin fel tawhah pawh courier services nuai tel sum chawitir an lo neih tawh thu te an sawi a, mipuiten an dikna chanvo an chan ngei theih nan dan hmanga rorelna hmun pan nachang hre chho zel se an duh thute an sawi a ni.
Consumer Disputes Redressal Commission, Aizawl District hi kum 1990 atang khan kalpui tan a ni a, consumer leh sumdawngte inkara harsatna thlen thubuai sang tel fe an lo ching fel tawh a, tunah hian commission-ah hian president bakah member pahnih awmin, anni hian ni tin deuhthaw thubuai hrang hrang an ngaihtuah thin a ni.