K-pop musician lar G-Dragon chu South Korea police te chuan zinchhuah an phalsak ta a, ruihhlo buaipui nia puhna chhui chhuzawm zel a ni.
Incheon Metropolitan Police Agency chuan G-Dragon hnena hriattirna pe in, tuna thubuai an chhui mek hnuaia zinchhuah an khapna chu an pawtsei dawn lo, an ti a ni.
Zaithiam ni bawk G-Dragon laka khapna thupek hi November 25, inrinni khan a tawp chiah a,Big Bang member hi a sam leh a kuttin enfiah a nih hnu-a negative a nih vangin a laka hrenna leh phuarna kalpui mek hi hlih an tum ta a ni
G-Dragon hi October thla tawp lam khan South Korea police te chuan ruihtheihthil a hmang nia ringhlelin a laka thubuai an siam a. Amaherawhchu, Big Bang member hian thuchhuah siam zuiin, a laka an puhna leh phuarna chu thubelhchian dawl lo a nih thu leh ruihhlo a khawih ngai loh thu a sawi.