Aizawl: Aizawl West II bialtu MLA Lalruatkima chuan Tuikual South MHIP Building, MLA Fund Rs 5,51,934 leh Dy Mayor R Thanglura fund hmanga sak chu a hawng.
Tuikual South MHIP President H Lalawmpuii kaihhruai hawnna inkhawmah Lalruatkima chuan Mizoramah NGO tha tak tak awmin, sorkar leh kohhrante nen NGO hi tang tlangin Zoram tan an tangkai takzet a. Heng lungthu pathum avang hian ram leh hnam, sakhua pawhin a him phah a, hripui len lai pawhin an tanrual that zarah an damkhawchhuak thei tih a sawi.
Chhungkuaa dinhmun pawimawh tak chelhtu chu hmeichhia an ni tih sawiin Lalruatkima chuan, “Tunlai hian hmeichhia leh mipa kan in tam hleih ta hle a. Death rate en pawhin mipa kan thi nasa em em mai a, hei hi a pawi tak zet a ni. Kan hriselna lam thuah pawh Mizo mipate kan inenkawl uluk lehzual a ngai hle a ni,” a ti.
Eizawnna leh sumdawnna lamah pawh Mizo hmeichhiate indaihzai ta hle tih sawiin Lalruatkima chuan, “Khawiah nge Mizo mipa kan awm tak? tih tur hial a ni ta a ni. Mizo mipaten chak lo zawka kan ngaih hmeichhiate atang hian kawng hrang hrangin zir tur kan ngah a. Taihmakna, tumruhna, teirei peihna leh kawng hrang hranga Mizo mipaten hmeichhiate kan entawn a ngai ta hial zawkin a lang a ni,” a ti bawk.