Naga politics buaina a tawp theih nana remna zawnga inbiakna (peace talk) kalpui mek chu Ningani hian zawh fel theih beisei a ni tawh a. He inbiakna hmabak neih tur avang hian Nagaland leh Manipur sorkar chu nasa taka inbuatsaihin thil tha lo thleng thei veng tur leh a thlen pawha che chhuak nghal turin police-te inring turin a ti a. Inralrinna hi mipui tithlabartu a ni zawk hlauh thung.
Nagaland sorkar chuan district tina deputy commissioner-te chu an awmna hmun (post)-a awm vek turin a ti a, an hnuaia mite pawh thuleh a awm hma chu an thawhna hmun lova lo awm rih lo turin a ti bawk.
Nagaland police headquarters pawhin chawlh lak a remti rih lo va, unit commander officer chawlh la zawng zawng pawh, dam lohna avanga chawl tih loh chu a kokir vek bawk.
An thenawm, Manipur-ah pawh Naga tam tak an awm avangin venhim hnathawktute inring tura tih an ni a. A bikin hmun venhim ngai zualah chuan hmeichhia thlenga duty-tir an ni.
Naga peace talk kalpui mekah hian a thawh hnuhnung ber chu Ningani kal ta khan neih niin kum 70 zet helna avanga an buai tawhna chu inbiak lehna turah hian chinfel theih an inbeisei.
Inbiakna neih tur atana heti taka inralrin a nih avang hian mipuite pawh an chiai hle a; mahse, Nagaland chief secretary Temjen Toy chuan chuan mipui tan chiaina tur a awm lo va, boruak a pangngai tih a sawi a, “Eng emaw thil tha lo thleng palh a awm hlauhva che chhuak turin kan inring mai a ni,” a ti.
Director General of Police T.John Longkumer pawhin dan leh thupek kenkawhna an tikhawng mai a nih thu a sawi a, “Thu kan dawn chuan hetiang hian kan fo ang,” tiin mipui tan buaina tur a awm lo tih a sawi a. “Mipuite hlim taka an awm theih nan kan inring zawk a ni,” tiin thlamuang taka awm turin mipuite a chah.
Naga peace talk an tih, NSCN(IM) hel pawl leh sorkarin remna an zawnna hi a rei tawh hle a. Sorkar laipui nen August 2015 khan Framework Agreement an lo siam tawh a. Ningania an inbiak lehna turah hian puanzar (flag) leh danpui (constitution) hran an ngiat dawn nia sawi a ni.
Framework Agreement pawh hi kum 18 chhunga vawi 80 chuang an inbiak hna an ziah fel chauh a ni a. Kum 1997 khan inkahhai an puang dun tawh bawk a. Nagaland-ah hian kum 1947-a India a indan atang khan India atanga indan duh avangin hela chhuak tam tak an awm a ni.