Rorelna Dik Duhtute Team chuan MLA Assembly inthlanpuiah tu party pawh lo sorkar se, mipuia an inzawrhna manifesto leh an intiamnate vil zui an tum tih an sawi.
Nimina Aizawl Press Club-a chanchinbu mite an kawmnaah Rorelna Dik Duhtute Team chuan an ke penna tur hrang hrangte an puang a, Lalrammawia chuan MLA inthlanpui neih zawh takah hian tu party leh pawl pawhin sorkarna lo siam sela, ram rorelna an kalpuina tur atana mipui hmaa an thu tiam hrang hrang te, an manifesto te chu a takin an kalpui em tih an bih zui dawn a, a tul huna an tha tichak tur leh kawng dik lo an zawh chang a lo awm pawha dodala hmalakna awm thei ang anga hma la turin an inruahman tih a sawi.
Rorelna Dik Duhtute Team chuan, hlemhlet, hleihneih, dan zah lohna, thuneihna hman sual, duhamna sual leh chutiangin a tihchhiat theih laka mihringpui ta tana din leh ke pen an tum thute sawiin, mipuiten kawng dik leh tha zawk, rilru pian ken fel zawk an neih theihna atana an phak ang tawk tawka zirtirna neih te, ram rorelna tha zawk neih zel a nih theihna tura mipuite zirtirna tur tha awm thei ang ang nia an hriat lam hawia zirtir leh kaihhruai tura ke pen an tum thute an sawi.
Mi mal leh pawl thuchah leh intiamna thusawite pawh zah zo lo, mihringpuite zahna leh duhsakna nei hauh lova an hlawhchhamna leh dinhmun sawi pial thiam an awm thei a, chungte chu an theih anga dodal an tum thute an sawi bawk a ni.