Italy lama season bul tan tha Bologna in league inkhel an hmachhawn hnuhnun berah tlawm mahse an tho lehnghal a, Torino lakah 2-0 in an chak.
Thawhtanni zana Stadio Renato Dall’Ara a inkhelah hian Bologna in Giovanni Fabbian leh Joshua Zirkzee te hmangin goal an khung a. A zawna match 10 tlawm lova an kal hnuah Fiorentina laka an tlawm a, mahse tunah an tho lehnghal a ni.
Minute 56-naah Fabbian-a’n goal khungin huntawp dawn tawhah Zirkzee-a’n an goal hnihna a khung ve leh bawk.
Inkhel dangah Verona in si phur zawk tum hnih an ni chungin an sut ve ve a, Lecce nen 2-2 in an inhnehtawk.
Verona in an khingpuite hi league a an inhmachhawn hnuhnung tum li ah hneh vek mahse tun tumah an lakah point an hloh a, hei vang hian relegation zone-ah an la awm phah.