Dutch police-te chuan South Africa atanga thlawhna kea a ruka chuang chu Amsterdam-a Schiphol tumhmun him dam takin an hmu.
Johannesburg atanga Amsterdam hi darkar 11 chuang thlawh thin a ni a, he bungraw phur thlawhna hi vawi khat, Nairobi, Kenya-ah a ding nia hriat a ni.
Hetianga thlawhna kea thui tak chuan hi dam chhuah a harsa hle a, a vawt a, a san tawh avanga oxygen a tam tawh loh vang a ni thin.
He pa hi a kum zat leh khawi ram mi nge a nih tih erawh police chuan an sawi lo.
Royal Dutch Military Police thupuangtu, Joanna Helmonds chuan, “He pa hi thlawhna hma lam ke awmna kilah a lo awm a, damdawi inah lak niin a dinhmun a tha,” tiin AFP news agency a hrilh.
“Hetianga a dam chhuak hi thil danglam tak a ni,” a ti.
Dutch broadcaster NOS chuan he pa hi an hmuh chhuah lai pawhin a taksa a lum leh hman tawh a, ambulance a thlen meuh chuan zawhna a chhang thei vek tawh tih a tar lang.
Bungraw phur thin thlawhna (freight carrier) Cargolux pawhin Reuters hnenah an thlawhna, Cargolux Italia-in a enkawl pakhat keah mi lo chuang ru an awm ngei thu hi email-in an hrilh tawh tih Reuters chuan a tar lang.
Flight data atanga a lan dan chuan Johannesburg atanga Pathiannia Schiphol pan Cargolux freight flight chu pakhat chauh a awm a, hei hi Nairobi-ah a ding zawk a. Chuang ru hi South Africa atang nge Kenya atangin a chuan tih an la hre lo.