Champhai Bawrhsap Maria CT Zuali sawnna thupek sut tura Mizoram sorkar an kar meknaah Sub-Hqrs. YMA inhnukdawk mah se, nimin khan Champhai District NGO Coordination Committee (NGO-CC) ruahman angin ‘Dikna Tun din Kawngzawh’ hlawhtling taka huaihawt a ni.
Champhai Vengsang Biak In kawt atangin chawhma dar 11-ah kawngzawh tan niin, tan hmaa inkhawm tawi neihah tun hnaia ZMC-a boral, Dr R. Laldinthara, Fin. Secy., NGO-CC chu Hranghmingthanga, Asst. Secy NGO-CC kaihhruaina hnuaiah a chanchin chhiarna hun leh sunna hun hman a ni.
NGO-CC aiawhin chairman, Lalnunmawia’n thu sawiin, kawng zawh chhan a nih dante a sawi hnuah, Champhai Thalai pawl (CTP) aiawhin President Lalnunsanga Fanai-in thu a sawi ve leh.
Hemi hnu hian kalkhawmte aurualna neih a nih hnuah Upa Darthangvunga Traffic Point pan thlak a ni a, he hmunah hian K. Lalmawia, Adviser, NGO-CC in thu a sawi a. DK Traffic Point-ah Lalthanfela, President MZP Hq., in thusawina hun a hmang ve lehin, hemi hnua Bethel kawnah Muana Hangsing, Secy NGO-CC in hun tawp a hmang ve thung a ni.
‘Dikna Tundin Kawngzawh’ huaihawta NGO aiawha thusawitu hrang hrangte chuan, an hmalaknaah sorkar an do loh thu leh sorkar lamah an tan zawk thu te, Champhai khawpui chhungah dikna rah beha awm mek tung ding leh tura hma la zawk an nih thu an sawi a. India leh Mizoram sorkar thuchhuah bawhzui a, Champhai Bawrhsapin Myanmar atanga dan loa phurh luh kuhva rah a man avanga mi dik lo zawka ngaihin Champhai Police Station-a FIR a thehlut ngam chu Champhai mipuiin lungawi thlak an tih loh thu an sawi a ni.
NGO hruaitute chuan, Champhai bawrhsap chu hmun danga sawn lo tur leh khawih che lo tura sorkaea an ngen hnu lawka, sawn chhuah lehnghal a ni chu mi dik zawk chung action lakna nia an hriat thu an sawi a. “Champhaiah diknain rorel se tih hi kan duh ber a, kuhva leh DC transfer ngawr ngawr hi kan do ber a ni lo a. Dikna rah beha a awm hi kan do ber zawk chu a ni. Mi pamham leh dik lo zawk te’n Champhai mipui min palzut hi kan phal dawn lo a ni,” an ti.
Kawngzawhnaah thusawitu NGO hruaitute chuan, dan hnuaiah dik taka sumdawnna a kal theihna tura sorkar an phut thu a sawi a. Zokhawpuia hnam dang sumdawng te’n bu an khuar ve theih lohna hmun tia inchhuang taka an sawi thin chu, Champhai leilungah ngei hnam dang sumdawngin ram an nei tia sawi thawm awm chungchangah pawh hian na taka hma lak a nih tur thu an sawi bawk.
NGO hruaitute chuan, Champhai Bawrhsap sawn chhuahna thupek sut tura hma an lakna kawng hrang hrangah, tun thlengin sorkarin a la bengkhawn lo chu mak an tih thu an sawi a. Chutih laiin, an duh leh an phut te a hlawhtlin hma chuan hma lak chhunzawm zel an tum thu an sawi bawk a ni.
NGO-CC huaihawta Champhai khaw chhunga ‘Dikna Tundin Kawngzawh’ ah kalkhawm te hian ‘Mi pamham te’n kan ram leh hnam an thunun mipuiin kan phal lo,’ tih te, ‘Mi diklo te hma-ah Champhai mipui kan tlawm dawn lo’ tih leh ‘Sorkar thupek kengkawh ngam Champhai DC transfer order hi kan sorkar hian sut nghal rawh se,’ tihte resolution an siam a ni.
Champhai atanga thu dawn danin, nimina kawng zawh hi an vaiin mi 1,000 bawr nia chhut a ni.
Hetih lai hian, January 22, 2022 zana Sub-Hqrs. YMA Champhai Executive committee thukhawm chuan, SYMA in Mizoram sorkara an ngenna anga Champhai Bawrhsap chu Republic Day 2022 thlenga a awm a hun pawhsei sak tak avangin, YMA kalzelna tur atan leh pawl him zawk nan tiin Champhai DC sawn chhuak lo tura hma laknaah action plan an thlawp chinah YMA anga tel tawh loh mai nise tia an rel angin, ‘Dikna Tundin Kawngzawh’ huaihawtah pawl angin an tel lo a ni.