Manchester United in UEFA Champions League knockout stage an beiseina an neih chu a tlem lehzual sawt a, Galatasaray lakah an dinhmun tha an hum theih loh avangin 3-3 in an inhnehtawk.
Nilaini zanah Istanbul-ah United hian hnehna chan ngei an mamawh a, chak thei turin dinhmun thaah indah mahse an thiltih thatte chu tlarhnung chetsual avangin a thlawn a. Rams Global Stadium-ah an goal an venhim theih loh an tuar.
Erik ten Hag-a pawlten nidang ang thovin khelhdan nghet an neih loh an tuar a. Chutihrualin goal an nawr danah erawh hmasawnna hmuh tur a awm. Minute 11-naah Alejandro Garnacho hmangin goal an khung a. Hei hi minute 18-naah Bruno Fernandes chuan goal mawi khungin a chhunzawm leh bawk.
United in goal hnihin hma hruai mahse inkhel an thunun lova, an khingpuiten football hlauhawm khelin tihthaih an tum ve reng.
Minute 29-naah Hakim Ziyech chuan freekick atangin goal a khung a. United goalkeeper Andre Onana chuan ho taka chhuahin mualneitu team leh fans te beiseina a siam.
Second half-ah United in inkhel an la thunun thei chuang lova, minute 55-naah Scott McTominay chuan Aaron Wan-Bissaka ball cross chu goal-ah a khung a, 3-1 in an sang zawk.
Mahse Galatsaray in beiseina an neih tlat rah an seng. Ziyech bawkin minute 69-naah tul lo taka Bruno Fernandes freekick chawi chu a khung leh a. Goal luh danah Onana bawkin mawhphurin a zawna ball kal a dang thei lo.
Minute 19 a la awmin Galatasaray substitute Kerem Akturkoglu chuan kawh takin an goal thumna a khung ve leh a ni.
United hian round of 16 lut turin Bayern Munich chu group match hnuhnung berah an hneh a ngai a, FC Copenhagen leh Galatasaray te an inhnehtawk an mamawh bawk.
United manager Erik ten Hag chuan, “A mawhphurtu chu keimah zel ka ni. Team din kan ni a, hmasawnna pawh a awm zel, hei vang hian kawng dik kan zawh a, beiseina sang tak kan nei. Mahse Champions League khelh zel kan duh chuan heng inkhelah hian kan chak a ngai.” tiin a sawi.
- Gunners in goal ruk khung
Arsenal in Group B-ah hmahruaitu ni chiang tawhin round of 16 an lut a. Emirates Stadium-ah an mikhual Lens chu 6-0 in an sawp.
Mahni mualah Arsenal in first half duhthusam an khel a, goal nga an khung hman.
Chawlhlawk hma in Kai Havertz, Gabriel Jesus, Bukayo Saka, Gabriel Martinelli leh Martin Odegaard ten goal an khung theuh a. Second half-ah penalty an hmuh chu Jorginho-a’n a khung ve leh bawk.
Group B atang pakhatna an nih chian hnuah Arsenal manager Mikel Arteta chuan, “Hetiang hi ka suangtuahnaah pawh a awm ngai lo. A tir atangin kan team kan huaisen em em a, chak tumin kan inkhel nghal.”
“A tir minute 30-ah khan engkim a kaltluang hle a, kha khan kan inkhel thui takin a nghawng a, hnehna chan nan a pawimawh hle.” tiin an inkhel a thlirlet.
Group B inkhel dangah PSV Eindhoven in Sevilla lakah goal chhuah hmasa mahse 3-2 in hnehna an chang a, anni pawhin round of 16 an lut chiang tawh.
Ramón Sánchez-Pizjuán Stadium-ah Sevilla in Sergio Ramos leh Youssef En-Nesyri te hmangin goal khung hmasa mahse Lucas Ocampos hnawhchhuah a nih hnuah PSV in an beilet a. Second half-ah Ismael Saibari leh Ricardo Pepi te goal khung inkarah Nemanja Gudelj own goal nei bawkin an chak.