Aizawl: Central YMA President Lalhmachhuana’n Mizoramah YMA hmel thar din an tum a, YMA hmelthar hmuh a nih theih nan YMA member tinten tan an lak tlan a ngai dawn tih a sawi.
He thu hi nimina Zawlbuk Group YMA Sports Meet kharna hun a hmanpuinaah a sawi a, Chhuantea chuan YMA awm tawhna hmun apiangah chuan dik lo nia hriat chu do ngam a ngai tawh tih sawiin, “Kan ram leh khawtlang a lo him theih nan i tangrual zel ang u,” a ti.
Lalhmachhuana chuan Mizoramin veng himtu a mamawh a, chumi atan chuan YMA an pawimawh hle tih sawiin, YMA member tinin tih tur an nei a, theihtawp an chhuah tlan a ngaih thu te, ram leh hnam dinchhuah nan chuan nek ngai leh ke pen chhuah ngai awmah pawh theihtawp chhuah tlan a ngai thu a sawi bawk a ni.
Zawlbuk Group YMA huam chhungah hian branch YMA 23 a awm a, branch YMA 23-te hian infiamna chi hrang hrang hmangin inelna an nei a, vawiin hian a kharna hun, Thingsulthliah Play ground-ah an hmang a ni.
Sport meet-ah hian infiamna chi hrang hrang pakua hmangin group chhung branch hrang hrangte an infiam a ni a, Tlungvel Gate Veng Br YMA te a pum puiah an champion a ni.