Premier League-ah Arsenal in point li in hma an hruai lailawk a, Wolverhampton Wanderers lakah goal hnih khungin 2-1 in an chak.
Inrinni zanah Emirates Stadium-ah UEFA Champions League a goal ruk khung hlim Arsenal in inrintawkna nena khatin bul an tan a, bul an tan tha.
Minute rukna lekah English winger Bukayo Saka chuan Craig Dawson-a lakah penalty area chhungah remchang la in goal a khung nghal.
Gunners in goal khung belh turin an nghah rei a ngai lo. Minute 13-naah Oleksandr Zinchenko leh Gabriel Jesus ten mawi taka ball inpe in Wolves an thiat a, Martin Odegaard chuan a a hmawr bawkin team goal tha a khung.
Mikel Arteta pawlten inkhel dahthat tumin theihtawp chhuahin an khel chhunzawm a, an goal thumna an khung teuh thin.
Leandro Trossard leh Jesus ten goal an khung teuh viau a, Gabriel Martinelli chuan goal ban a pet per bawk.
Second half-ah Wolves an insiamtha a. Matheus Cunha chuan David Raya tan hna a siamak hnuah huntawp hma in goal mawi a khung ve leh bawk a. mahse Gary O’Neil-a pawlten a bak ti thei lovin Eddie Nketiah chuan Gunners goal thumna a khung belh teuh.
Arsenal manager Mikel Arteta chuan, “Football hi duhthusam anga kal diak diak a ni ngai lova, mahse kan inkhelh danah ka lung a awi hle.”
“Tun aia chiang zawka chak thei tur kan ni. Mahse tihsual kan nei a, anni lamin remchangah an la. Hei hi Premier League-ah hian thil thleng fo a ni.” tiin a sawi a.
“Kan chak chhunzawm zel a, kan inkhelh dan hi a tlakhniam lohna tura theihtawp kan chhuah zel a ngai.” tiin a sawi bawk.
- Magpies chak chiang
Newcastle United in thla khat chhunga a vawi hnih nan Manchester United lakah kawng engkimah chungnung zawkin hnehna a chang a, Anthony Gordon goal khung hmangin 1-0 in an chak.
St. James’ Park ah Newcastle United in an mikhualte hi khelmuala an awmchhun zawngin kawng engkimah an hneh zawk a. Goal hmaah hriam se goal engemaw zat khung thei tur an ni.
First half a goal a luh loh hnuah second half minute 55-naah Kieran Trippier ball cross chu tunhnaia che tha tak Gordon-a’n goal-ah a khung.
Mahse Eddie Howe-a tana chanchin lawmawm lo erawh goalkeeper Nick Pope inhliam a ni a. First team player inhliam ngah tawh tak Newcastle in an neih belh.
Newcastle boss Eddie Howe chuan, “Ka player-te lakah tun ai hian ka hlim thei lovang. Tunhnai team lian pathum kan hmachhawn tuma kan inkhelh dan a lungawithlak tak zet. Hei hian inrintawkna lian tak min siamsak dawn a ni.” a ti.