Aizawl: Central YMA President Lalhmachhuana chuan Kristiante ni pawimawh tak humhalh kawngah YMA-ten hma an lakna chu an tihawm taka mawi a nih thu a sawi.
YMA Sub-Headquarter Hnahthial-in nimina District Volleyball Court, Hnahthiala YMA Inter Branch Volleyball Tournament leh ruihhlo do hawnna inkhawm an buatsaih chu Lalhmachhuana, President, CYMA-in a hmanpui a. Thu sawiin Kristiante ni pawimawh, Pathianni serh a nih theih nana ECI-a hmalakna a hlawhtlin chu lawmawm a tih thu a sawiin, “Hetiang Kristiante ni pawimawh tak humhalhna kawnga YMA-ten hma an lakna chu YMA tihawm taka mawi a ni,” a ti.
Lalhmachhuana chuan Hnahthial Sub-Hqr YMA hruaitute chu YMA a chak lehzual theih nan huaisen taka kal turin a chah a. Tournament buatsaih a nih ang taka ruihhlo laka fihlim tur leh ruihhloin a tihbuai YMA member-te chhanchhuahna kawngah pawh theihtawp chhuah theuh turin a fuih.
Mizo hnam innghahna lungphum pawimawh ber chu YMA a nih thu sawiin Central YMA president hian, “Kan unau ram pawna harsatna tawkten YMA sutpui rawn vuanin an harsatna tawhte chu a theih ang angin YMA-in a tuamhlawm zel dawn a ni,” tiin, YMA hi kawng hrang hranga Mizo ram leh hnam innghahna ban pawimawh tak a nih angin Hnahthial Sub-Hqr YMA huamchungah pawh member-te leh hruaituten tan la thar sauh sauh turin a fuih bawk.