Aizawl: Mizoram Synod Inkhawmpui vawi 100-na, Mission Veng Kohhrana neih mekah nimin khan rorel chhunzawm a ni a, Mizoin kûtpui an hman thin tha zawka hman a nih theih nan hmalak an rel.
Nimina rorel inkhawm ni hnihnaah agenda 13 sawiho a ni a, chung zingah chuan Kolasib Presbytery atanga lut, ‘Mizoin kûtpui kan hman thin tha zawka hman’ tih chu pawm a ni a, Synod Executive Committee (SEC) bawhzui turin dah a ni a, Champhai South leh Chhimphei Presbytery atanga lut, ‘Probationary Pastor lak dan en that’ rawtna leh Lunglei East Presbytery atanga rawtna lut, ‘Probationary Pastor interview hun chhung ni hnih’ tih chu sawi kawp a ni a, SEC-in lo en tha se, Synod-ah thlen leh tura tih a ni.
Heng bakah hian Aizawl Chhim leh Aizawl West II Presbytery atanga rawtna lut, ‘Tualchhung Kohhran inkhawm a bi kima inang tlanga kal’ tih chu sawihoin, ‘tuna kan inkhawm kalphung hi zawm theuh tur a ni e,’ tih a ni a; Tuichangral North Presbyery atanga ‘Pathian biak inkhawma sorkar thu puanzâr thin tihtawp’ rawtna lut chu ‘tuna kalpui dan hi a tha tawk e’ tih a ni.
Rorel inkhawm hi vawiin chawhma dar 9:30-ah chhunzawm leh a ni ang a, Inrinni thleng neih a ni ang.