Mizoram sorkar thar, ZPM Leader Lalduhoma kaihhruai chu vawiin hian larsapin rinawmna thu tiamtirin a la lut dawn.
Lalduhoma kaihhruai ZPM ministry chu vawiin chawhma dar 11-a la lut tur hian ruahmanna engkim peih fel a ni tawh a, lak luh inkhawm hi Raj Bhavan tualah neih tura ruahman ni mah se khua a that loh chuan Assembly Annexe Conference Hall-ah sawn a ni mai thei.
Sorkar lak luh inkhawmah Chief Secretary Dr Renu Sharma chuan chief minister leh a kaihhruai ministry-a minister turte hming puangin a ko chhuak ang a, larsap chuan Lalduhoma chu chief minister atan rinawmna thu tiamtirin a la lut hmasa ber ang a, chumi hnuah council of minister atana ruatte a la lut ve leh ang, sorkar thar lak luh inkhawmah Synod Choir-in ‘Ro min relsak ang che’ tih hla an rem dawn a ni.
Sorkar thar lak luh zawhah chief minister chuan Raj Bhavan-ah vek thuthar thehdarhtute a kawm ang a, pro-tem speaker tur an thlang bawk ang.
Vawiina sorkar thar lak luh tur hi Mizoram state-a hlan kai a nih hnua sorkar pakuana tur a ni a, Mizoram hian union territory a nih hnua atangin chief minister panga a nei tawh a, Lalduhoma hi a parukna tur a ni.