Kan sawrkar thara chief minister thupuan zingah project kallaite en nawn / enfiah a ti a. A lawmawm hle mai. Kan ramah hian project hi kan khawih tam tawh hle a. Project ti ve hluai si hian kan ti hlamzuih tam hle tawh a. Central project ani emaw, state sawrkar project ani emaw, zuzi taka hlamzuih tir hi a tam tawh takzet a ni.
Kan project kal mek zingah mau hi a langsar hle a. Bamboo project hi a sawi pawh kan sawi tam a. Kan chief minister kal chhuak ta in a ngaipawimawh em em kha a ni a. A kuitiah atangin mipui hriat lohin sawrkar pawisa vaibelchhe tel a liam a. A chinna tur hmun kawng laihah sum tam tham em em mai kan khawhral leh a. A ching tur nia hriatte pawh lo vah man kan pe a. Kan sum sen hi a namai tawh lo takzet. Hetiang hi ani chungin vawiin ni thlengin mau atang ei hmu emaw, hlawk pui ta hi sawi tur kan la nei mumal hauh lo a. Chuvangin heti taka sawrkar sum khawhralna hi sawrkar thar tan chuan en nawn ngei ngei chi ani ang.
Project hrang hrangte enfiah, en nawn hi a tul ngawih ngawih rualin kan enfiah dan pawh ti mai mai a enliam puat lovin en ila. Hlawhtlinna turin hma kan lo la reng em? Kan sawi satliah nge tih tak takin hma kan la tih hi enfiah vat a ngai a. Kan sum khawral kha kan state sawrkarin a thawhchhuah ni lovin, pawisa puka kan siam nite pawhin a lang bawk.
Sawrkarin a enfiah aniha, a fel lohna lai a awm anih chuan a tul anga dan hnuaia hma laka, hremna lek hial a tul anih pawhin a ti ngam tur a ni. Hun kal tawha Minister leh officer thenkhat hna enfiah / endik ten en ve siin action engmah awm lova ngawih liampui an nei fo thin. Officer te leh a khawihtuten an lo pha liam a, harsatna an tawhte an lo hrilh a, pawmpui liam ta mai mai an awm thin. Hei hi a chhan pakhat chu a endiktu hi an lo tih lungawi thin vang a ni. Chu tak chuan mipuite tawrhna a thlen ta thin.
Kan sawrkar thar hian hmalakna tur tam tak a puan zingah pawh hun kal tawha thil fel lo, tih dan leh kalphung fel lo hi a enchian a ngai. Thenkhat hi chu chhunzawm leh aia hlamchhiah tawp hlawk zawk pawh a awm ang. A then erawh chu a kalphung siamthat a, ram tana hlawk zawk a awm thei a. Uluk taka zir chunga kan project kal liam tawh leh kal lai mekteah hian ramin a hlawkpui ngei turin hma han la sela. Dikna lo chuan kan ram tluchhe mek hi a siamtha dawn lova. Dikna laltiang vaiin kan hotute hi han pen dual dual ami teh se. Mi ram chief minister kan awh ngawih ngawihna pawh min theihnghilh tir ngei dawn a ni.