Manchester United tan season harsa a kaltluang zel a. UEFA Champions League ah an chetsual fo thin chu tuarin Bayern Munich lakah an inkhel hnuhnung berah an tlawm a, group stage atangin an tla.
Old Trafford-ah Erik ten Hag-a pawlte hian league inkhel hnuhnung berah 3-0 in Bournemouth lakah an tlawm hnuah German champion an mikhual a. An tan round of 16 atana tling turin an chak ngei bakah Copenhagen leh Galatasaray te an inhnehtawk a ngai.
Bayern hi Group A-ah pakhatna ni chiang tawh an ni a, nimahsela heti chung hian United tan chai tham fe an la ni tho. English club in an mikhualte an chhaihbuai tak tak thei lo.
First half-ah defender Harry Maguire inhliam avanga lakchhuah a ngai a, Luke Shaw-a’n hliam vang thovin second half a khel lo bawk. Lehlamah Copenhagen in goal an khung bawk avangin United dinhmun a hmawr.
A belhchhah turin Kingsley Coman chuan minute 70-naah inkhel a goal awmchhun a khung.
Manchester United boss Erik ten Hag chuan, “Vawiinah kan khel hrim hrim a chhe lo. Mahse vawiin result avanga tla hi kan ni lo. Result tha nei zawn tha zawk tura kan insiamthat hi a ngai a. Manager ka nih angin team ka tih hmasawn a ngai a, player-te hi ka kaihhruai an ngai a, anni lamin mawhphurhna an lak a ngai ve bawk.” tiin a sawi.
Copenhagen in Lukas Lerager goal khung hmangin 1-0 in Galatasaray an hneh a. Kum 10 chuang hnua a vawikhatna atan Champions League knockout stage an khel dawn.
- Napoli an tling
Italy champion Napoli in first half-ah goal hnih khungin UEFA Champions League round of 16 an inhlangkai.
Stadio Diego Armando Maradona-ah Napoli hian Braga an mikhual a, 2-0 a hnehna an chan avangin Group C-ah pahnihna an ni. Lehlamah Braga hi tlawm mahse inkhel lehlamah Union Berlin an tlawm avangin Europa League an khel ang.
Napoli in minute 9-naah goal nei hmasa in Matteo Politano ball cross chu Serdar Saatci chuan an lamah a ti lut a. Minute 33-naah an hnehna tichiang turin striker Victor Osimhen chuan an goal hnihna a khung lehnghal a ni.
November thla a Rudi Garcia thlak tura lakluh Napoli manager Walter Mazzarri chuan, “Kan player-te hian Italy champion nih hautakzia an hriatthiam a ngai a, chuvang hian he mawhphurhna la thei tur hian ka hrual an ngai.”
“Goal chhuah loh a tlin kha ka ngai pawimawh hle a. Tunhnaiah kan inkhel a nghet tawk thin lova, chuvangin team hi tlarhma leh a hnungah a inkhairual a pawimawh hle.” tiin inkhel zawhah a sawi.
Real Madrid in Group C-ah match ruk atang hnehna an chang vek a. Olympiastadion-ah minute 89-naah Dani Ceballos chuan chakna goal khungin 3-2 in German club an hneh a. Los Blancos tan hian striker Joselu chuan goal hnih a khung.