Aizawl: MNF party chuan Manipur, Myanmar leh Bangladesh atanga Mizorama sahimna zawnga Zo hnahthlak raltlante tana theihtawp chhuah chhunzawm turin ZPM kaihhruai sorkar an chah.
Nimina thuchhuah an siamah MNF chuan Pathian leh mipuite duh dan angin sorkar thar ZPM kaihhruai sorkar chu sorkar hmasain theihtawp a lo chhuahpui tawh angin Zo hnahthlak unau raltlante tan theihtawp chhuah chhunzawm turin an chah.
An duh reng vang ni hauh lova Zo hnahthlak unau Myanmar, Bangladesh leh Manipur-a chengte chuan harsatna namen lo tawkin, an chenna hmunah tihduhdah, nghaisak leh thah an tawk tih sawiin MNF chuan, “An nunna humhim turin Zofate Jerusalem, Mizoram an rawn pan a ni. Myanmar leh Bangladesh atanga rawn tlanlutte phei chu thawn let turin India sorkarin na takin Mizoram sorkar rawn nawr mah se, kan unau, kan thisen zawmpuite chu ‘dam leh tlang khatah, thih leh ruam khatah’ tiin MNF kaihhruai sorkar khan a lo hum a. Mipuite nen tangkawpin ei leh in, chenna leh thuamhnaw bakah zirna thlengin a pe a. An tan huaisen takin a ding tlang a ni,” an ti.
MNF chuan, “Mizo hnamin a mawhphurhna tlansan lova a dingnghet tlat angin, kan unaute hi an chenna hmun ralmuang a nih a, zalen taka nun an hman leh theih hma chu thlamuang taka Mizorama an awmzui zelna turin Mizoram sorkar, ZPM kaihhruai chu ding chhunzawm zel tur leh nghei lo va, an mamawh angte pe chhunzawm zel turin a chah,” tiin, Zo hnam inpumkhatna kawnga huaisen taka ‘pa’ chan changa a din chhunzawm zel an beisei thu an tar lang bawk.