- Lalnunmawia Pachuau
Kumthar tir hunawl hmangin Serlui ‘B’ Hydel Project lamah Aizawl khawpui ri luih luih kalsanin kan liam thla ve a. Tourist Lodge-ah innghah a hahdamthlakin a fai nuam em em a, a nghaktu ten ei leh in siam an thiam em vangin a manhla hla hle bawk. Tourist Lodge tha tak kan neih pawh cheihnum a ni a, hmuh pawh a hahdam hle.
Amaherawhchu ti teh ang.. Tourist Lodge-a chawlh zu hman ngawr ngawr khu enjoyment a ni lo a, hun hlimawm taka hman ralna tur enjoyment kan mamawh tel thin. Hemi kawngah erawh duhthu a sam lo hle mai a, tuikhuah zuk en leh mimal Taikuang lawnga man to taka chuan bak chu tihtur reng a awm lo a, a tuikhuah ber lah chuan a mawina a lo hloh nasa hle tawh bawk.
Serlui B hi khualzin hip tura cheihnuma tuaithar leh hi a chakawm em em a, Foreign leh State dang atang te pawhin an lo pan ve vang vang thin a, mahse an beisei a phak loh lutuk vangin rilru na taka haw chang an nei fo nia sawi a ni. Keimahni ram chhung thalai, nu leh pa, nunau te pawhin chawlh an hman theihna tur atana thlakhlelhawmin kan Sawrkar thar hian han thuam tha leh se, sum tlemte senga cheihnum leh theih a nih vang hian theihtawp han chhuah leh se a duhawm takzet a ni.
Tourism hmasawnna a tan kan sawrkar hian ke han pen thar leh se, Khualzin hip lamah theihtawp han chhuah leh se, chu mi atana rawtna tlemte han zep ve ila:
1.TOURIST LODGE KALKAWNG SIAM THAT A NGAI: Bilkhawthlir atanga tlan luhna kawng chu a zim deuh na in Rigid pavement vek a nih vangin tun dinhmunah chuan a la tha a, Hydel Project/Tourist lodge peng thleng chu thawm that tur pawh a tlem hle. Kawng pangnai atanga Lodge panna kawng (approach road) erawh blacktop a nih loh bakah a tha lo hle a, a chhe zual lai khu Km 1 awrh chauh a ni a, siamthat a harsa lo hle ang. Khu khuan lirtheia pan te tan tlan a ti hreawm hle.
2.TUIPAR (WATER LILY) THENFAI A NGAI: Serlui ‘B’ HP hawn hlim khan khualzin a hip em em a, tlawhtu an thahnemin a Tui pawh a thianghlimin bawhtu pawh a nei lo a, a mawi thin hle. Amaherawhchu, tun dinhmunah chuan Tuipar khuan a bawh khat hring vek tawh a, a lang tenawm tawh hle a, tuikhuah ni si khu hnai tea thlir pawhin leilet zawl, dum hmun a ang em em tawh mai a ni. Tuipar khu thenfai a nih loh chuan kum 2/1 chhung hian tuikhuah pumpui khu a bawhkhat zo tawh dawn a, mawina a nei tawh lo ang a, lawnga kal theih pawh a ni tawh lo ang. He’ng Tuipar thenfai hna project te hi kalpui se a duhawm hle.
3.A HMUNHMA CHEIHNNUM A AWM LO: Tourist Lodge atanga chhukna Step chhuk deuhah kalin Tuikhuah kiang kan zu thleng a, a kama Waiting Shed te chu hnimin a bawhkhat vek a, kalpawh theih pawh a ni tawh lo. Tuikhuah kianga huan nei ten a kam tuak hmun thenkhat tifai lo phei se chu tuikhuah panna kawng pawh a kaw lo hial ang. Tuikhuah zu pawhna lai, hmun zau lem lo te khu chu lawilen nuam takin han chei hnum ve se a duhawm hle.
4.ISLAND NGAIHTHAH A NI: Serlui B Tuikhuaha mipui tlawhchak pakhat chu Island khu a ni a, mahse tunah chuah khaw ram ang maiin a chul rup a, a hmunhma leh a chhehvel te a hnim chhup a, tlawh a chakawm loh hle. Rest House leh Cottage awm te chu ngaihthah tih hriat rengin tlawh pawh a chakawm loh hle bawk. Island khu Power & Electricity Department enkawl a ni thung a, Tourism hnena hlan theih ni se a duhawm hle.
5.ENJOYMENT INFRASTRUCTURE SIAM BELH NI SE: Tuna Serlui B tlawhtu te chuan Taikuang lawnga chuan bak tih tur an nei lo. Tourism Department hian Lawng pakhat tal dah ve se a duhawm hle. Hei bakah hian lawngte, nghakuai chiahna atana hire mai theih te awm se la. Nghakuai leh Light Jacket thlengin hire tur awm se, Sky Diving thlengin tun lai thalai te hip thei turin cheibawl ni se Tourist kan hip thar leh ngeiin a rinawm. Hei bakah Island panna turin Forest Rest House tlang atangin Rope Way te siam phei theih ni se a duhawm hle bawk.
6.SANGHA KHAWI LEH ILA: Tunah chuan Fishery Department ten Sangha an khawi te an lo titawp tawhin an lo rauhsan thap tawh a. He’ng te pawh hi Khualzin te man awlsam thei tur Sangha te khawi leh ni se, Nghakuai chiah man thlengin ruahmanna siam se a duhawm hle.
Tuna kan dinhmun ber chu Serlui B Tourist Lodge tha tak leh thianghlim tak, tlawhtu awm mang lo kan nei lurh mai a, kan sawrkar hian revenue a nei thei dawn lo tih a langchiang hle. Tourism hmasawnna kan ngaihtuah zingah Serlui B Tuikhuah, Mizoram State ta ngei hi duh thala cheibawl theih a nih vangin han tuaihnum leh thei ila a duhawm takzet a ni.
A chunga ruahmanna tlemte pawh khi tihlawhtling thei ila, Serlui B Tuikhuah hi Revenue hmuhna atan kan hmang leh ngeiin a rinawm a, Aizawl khawpui atangin a hla lo hle a, khawpui tawt lutuk kalsana hahchawlhna hmanna hmun nuam takin han cheihnum leh thei ila a duhawm takzet a ni. Kan sawrkar thar hian ngaihtuahna fim tak nen hma han la thar leh se a duhawm takzet e.