Aizawl : Mamit-a India Republic Day lawmnaa khuallian Mamit Bawrhsap V.L. Remliana’n India ramin Danpui, Constitution an neih tan ni January ni 26, 1950 chu India mi te tan ni ropui leh chhinchhiahtlak tak a nih thu a sawi a. Hemi denchhen hian kumtin Republic Day lawm thin a nih thu a sawi.
Mipuite duhthusam leh beisei anga mitin intluktlanna, zalenna, inunauna leh inpumkhatna ram ni tura India ramin mahnia inrelbawlna a neih theihna tura ram danpui lo duangchhuaktu ram hruaitu hmasate hrerenga rilrua zahna chibai buk turin mipuite a sawm a. “Kan ram hruaitute leh ram mipuite thawhrimna zarah India ram chu khawvela sawrkar chak leh ropui zinga chhiar theihin a thang zel a, nikum kumtawp lama Mizoram State Legislative Assembly tluang tak leh harsatna awm lova kan kalpui thei te khan kan Constitution ropui zia a tarlang chiang hle” Mamit Bawrhsap chuan a ti.