January ni 27 atanga February ni 2, 2024 chhunga Mohali, Punjab-a khelh zawh tak Yonex-Sunrise Maharaja Agrasen All India Masters Ranking Badminton Tournament 2024-ah Mizoram Police Badminton Club (MPBC) player Lalthanzuala chuan bronze medal a dawng.
Chanmari West tlangval Zuala hian seeded no 4 ni chungin he tournament hi 55+ men’s singles huangah a hmachhawn a; round of 32 ah Sawinder Singh chu 21-6, 21-16 hnehin bul a tang a. Round of 16-ah khingpui hautak zawk nei bawk mah se, seeded no 9 Prashant Mukherhjee chu straight set in a hneh a. Quarter-final-ah Nagaland player seeded no 5 Achumi Yakhuvi chu set hloh lovin a vaw tla leh ngat a, harsatna a tawk meuh lo.
Semi-final a luh thlengin a kawng tluang hle mah se Semi-final-ah World Masters Badminton Cham-pionship-a 55+ men’s singles category a champion lai a Rajeev Sharma a hmachhawn a. Zuala hian khel chhe lem lo viau mah se uiawm takin a tlawm a, final a lut zo ta lo. Nikum khan Zuala hian All India Masters Ranking Tournament final-ah Sharma hi a lo hneh tawh lo tawh a, tun tumah pawh a kawng daltu a ni nawn leh.
Zuala chuan, “World champion ni hlimhlawt a ni a, ball kan in thiam hleih deuh a ni. Min tawngtaipui a, min lo tantute zawng zawng chungah lawmthu ka sawi a ni,” a ti.
Mizoram Badminton Association chuan thuchhuah siamin, Mizoram tihmingtha a, India ram pum inelnaa lawmman pathumna dawng phak Lalthanzuala chu a chhuangin a lawmpui tak zet tih an tarlang a, a kal zelna turah duhsakna an hlan nghal bawk.